DUNA nay duha ka persons of interest ang kapulisan sa syudad sa Sugbo sa pagbanhig patay kang Ronda Vice Mayor Jonnah John Ungab human makita ang kuha sa CCTV video sa sulod ug gawas sa Qimonda IT Center.
Wa lang una ipakita sa CCPO sa mga sakop sa media ang kuha sa CCTV diin makita ang hulagway sa mga suspek sa pag ambush patay kang Ungab.
Matod ni Sr. Insp. Jonathan Taneo, hepe sa Homicide Section, nga ila nang nasubay nga dunay laing tawo nga maoy spotter sa sulod sa building sa Qimonda diin nahimutang ang tanang korte sa syudad sa Sugbo.
Ang maong lalake nakuhaan og video sa sulod ug gawas sa building sa dihang miagi ang sakyanan ni Ungab ug mihunong sa atubangan sa Qimonda aron pasakyon ang asawa niini nga si Pearl.
Duna kini gikahinabi sa iyang cellular phone ug misusi sa luyo sa sakyanan mi Ungab.
Gituohan nga misusi sa brand ug plate number ug nibalhin ni sa atubangan aron klaruhon ang nagmaneho.
Ang video nitakdo usab sa oras sa laing CCTV camera nga nakatutok sa gawas sa building diin maklaro usab ang nagpaabot nga gun man nga naghawid usab sa iyang cellular phone nga dunay gikahinabi.
Pipila ka gutlo ang nakalabay, niagi sa iyang atubangan ang sakyanan ni Ungab ug sa dihang nakompirmar ang plate number ug model, lakip na ang color, giduol kini sa gunman ug dayong dul-it sa pagpusil sa makaduha ka higayon.
Wa pa nila mailhi kinsa ang maong mga tawo apan tungod kay naklaro na ang panagway sa spotter, subayon sa Task Force Ungab kon unsay nakabutang sa logbook sa gwardiya sa entrance sa Qimonda.
“As of now, usa na sa atong gi identify ang iyang name through sa logbook didto or sa document nga gi log sa sud sa building usa na sa atong gitan-aw nga mo-support sa identity sa persons of interest nato,” matod ni Taneo.
Ang usa sa ilang tan-awon karon sa kapulisan kon unsang orasa misulod ang spotter sa building ug pila kini ka oras nga nagpaabot nga moabot si Ungab lakip na ang posibling mga kauban niini.
Sa laing video makita ang pagkanaog sa hagdanan sa lalake diin aduna siyay mga kauban nga gituohang iyang gikaestorya.