Sugilanon: Ang babaye nga gigutom

Lamberto G. Ceballos

Cawayan, Dalaguete, Cebu

NAGLAKAW ko subay sa aseras sa Colonnaide Mall sa dalan Colon dihang gikahinagbo ko ang usa ka babaye nga kalit miharang nako. Mihunong ko ug mitutok kaniya. Guwapahon siya ug limpyo ang nawong. Taas ang iyang buhok nga nagdunghay kutob sa abaga. Taas ko niyag mga tres pulgadas. Nagsul-ob siyag blawos nga puti ug itom nga skinny jeans. Sa akong banabana kuwarintahon iyang edad. Himsog iyang panglawas. Gikan pa ko sa accounting office nga akong gialagaran nga nahimutang sa bilding atbang sa UV. Gitan-aw ko ang akong relo sa bukton: alas 6:10 na sa hapon.

u201cGutom ko, Sir. Pakan-a ko bi!” sa babaye nga mitutok sab nako. Nabatyagan nako nga wa siyay gibitbit bisan clutch bag na lang. Diha mi tungod sa Jollibee, ubos sa Oriente.

u201cNaa ang Jollibee, nganong wa ka mosud?” matod ko.

u201cWa koy kwarta. Nabilin sa amo akong bag. Ug karon gigutom ko. Pakan-a ko, Sir. I’ll refund you later,” matod sa babaye nga sagol Iningles. Nagpakiluoy iyang mga mata.

u201cOkey, tana. Manud ta sa Jollibee kay gigutom sab ko da,” misulti ko.

Human namog pangaon nanggawas mi sa Jollibee. Sa loading/unloading area naghuwat kog dyip nga kasakyan pauli sa amo sa Basak. Napugwat ko kay kalit may miggunit sa akong bukton. Ang babaye nga nangayog kaon. “Sir, kuyog lang ko nimo, bi. Okey?” Uy, mona ni ron! Single pa ra ba ko, bisan 45 na. Ug diay guwapang babaye nga nanghagad nga mokuyog nako. Swerting malabo! Pero basig unya mahimong swerting dekasahos!

Mikuot ko sa akong pitaka ug mikuhag tibuok usa ka gatos ug gitunol sa babaye, “O, iplete ni. Uli sa inyo. Unsa gani toy imong ngan?”

u201cMerlyn. Pero, nalimot man ko hain amo, kuyog lang ko nimo, Sir, god!” sa babaye nga hugot migunit sa akong bukton.

Misantop sa akong hunahuna nga basin og sakop ning babayhana sa sindikato sa mga mangingilad. Basin ako ang ilang nakit-an nga biktimahon. Mikuba-kuba ang akong dughan sa kabalaka. Apan mi-insister ang babaye nga mokuyog nako kay nahadlok siya nga may magbinuang niya. Mipara ko og taksi ug nanakay mi. Misantop sa akong hunahuna nga dad-on ko siya sa motel aron adto mi magpalabay sa gabii. Apan giabot kog kaluoy sa babaye.

Didto sa gipuy-an kong apartment gipalingkod ko siya sa sopa sa sala. Gipatokar ko ang TV aron siya malingaw. Misaka ko sa itaas ug nag-ilis og sapot pangkatulog. Nanaog ko dala ang spare pajama. Gitunol nako ang padyama kaniya.

u201cNaa ang banyo duol sa kusina,” matod ko kon mag-ilis siya.

u201cThank you so much, Sir! You’re very kind!” tubag niya.

u201cMerlyn, is it okay for you to sleep here on the sofa?” mibawos kog Iningles.

u201cOf course! One who needs help must accept it without qualm!” ni Merlyn nga mipahiyom, tam-is nga pahiyom nga mihunob sa akong galamhan.

Sa akong lawak wa ko mahikatulog dayon. Naghiwasa ko sa nagdibal nga pagbati. Buot kong manaog ug gakson si Merlyn. Nagtuo ko di siya mobalibad. Pahimusli ang higayon! Mais na ang miduol sa manok. ‘Ayaw kana buhata!’ mipakgang ang maayong konsensiya.

Pagka buntag, sayo kong mibangon aron magluto og pamahaw. Apan wa na si Merlyn didto sa sopa. Nabati ko ang kasikas gikan sa kusina. Tua siya didto.

Gipatukar ko ang TV ug maoy natukmaan ang panawagan sa Channel 3 bahin sa usa ka babayeng biyuda nga may ‘temporary amnesia’ kansang pangalan mao si Ellen Lumayno, 42 edad ug wala mahiuli sa ilang balay kagabii. Kinsa kadtong nakakita kaniya palihog tawag kang Jessa sa cp# 90901234321. Ang hulagway nga gipakita sa TV mao ang hitsura ni Merlyn. Dali kong misaka sa itaas aron pagkuha sa akong selpon. Gitawagan nako si Jessa. Pagbalik nako sa sala diha si Merlyn nga nagpahiyom, nangagda alang sa pamahaw. (Katapusan)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph