Sugilanon: Balak, bi!

NATUKAS ang gana ni Jose pagsuwat og balak dihang 14 anyos na siya. Ang kagaw sa kaibog sa mga chicks nangamang na sa iyang dughan. Diha na siya sa third year high school dihang miabot ang usa ka transferee. Eliza ang iyang ngalan nga nahimo nilang classmate.

Katahom ni Eliza! Kaamgid siya sa rosas nga bag-ong mibuklad nga gihagkan sa bag-ong misidlak nga Adlaw sa silangan. Puti kay mestisa Insek. Apan malulot ang iyang mga mata daw sama sa limbaong silaw sa kasadpan sa nanamilit nga kahapunon. Busa tin-awng nabihag si Jose. Apan di kay siya ra ang gipana ni Kupido. Lakip na ang daghan niyang mga classmate. Nabintahaan siya kay sila mga anak og sapian. Di siya makahatag og regalo lahi nilang Carlos, Mikey, Rigor ug Roger.

u201cIgo lang siyang gibaling sa kahilom. Matag gabii sungugon sa mga daman ug alimungaw. Apan nakapahungaw siya. Misundog siya sa mga balak nga nangapatik sa Bisaya sa “Panid sa mga Damgo.” Gipahinungdan niya si Eliza sa hilom. Di lang kausa, kaduha ug katulo, apan di maihap nga sinundog nga mga balak alang kang Eliza. Wa lang siya nahibawo nga sa punay niyag sundog sa mga balak sa Bisaya nabuksan ang iyang kahibawo sa pagsuwat.

Usa ka adlaw, gipatawag siya sa spiritual director sa ilang tulonghaan. Estrikto ang maong pari. Gikulbaan siya. Ngano kaha nga siya gipatawag?

u201cJose, gipatawag ko ikaw aron mangutana kon tinuod ba nga napuno ang imong mga notebook og mga balak.”

u201cTinuod na, Father.” Miduko si Jose kay mitutok niya ang pari.

u201cSa ato pa, wa na ka magtuon sa imong mga leksiyon. Hibaw-i baya, you are fighting for the valedictorian honorship next year.” Wa siya katingog labi nang mipilit gihapon ang mga mata sa pari kaniya.

u201cKuan diay, buhati kog balak alang kang Birhen Maria kay butangan kog huni.” Mipugos siya pagtan-aw sa pari kay wa siya makatuo sa gihangyo niini. Mitangdo si Jose.

Natagik niya ang balak nga gipangayo sa pari. Natawo ang matahom nga awit nga ang lyrics sinuwat ni Jose. Nabaniog sa tibuok lungsod ang talento ni Jose. Miabot ang Junior & Senior’s Prom. Sa ladies’ choice nga sayaw gikuha siya ni Eliza. Katindugon siya dili.

Si Eliza gyud mipili niya? Apan nadayon gyud silag sayaw sa sweet music sa awit nga “Around the World”. Mora siyag giduyan sa huyuhoy nga nagpaanod sa katamis sa mga gutlo uban sa linalang nga unang nakapapitik sa iyang kasingkasing.

Kalit gibuak ni Eliza ang kahilom. “Balak, bi!”

Mora siyag natuk-an. “ Wa… Way masuko Eliza?”

Nahuman ang gabii nga nagkasabot ang ilang mga kasingkasing. Nahimong malipayon ang ilang mga adlaw. Si Eliza nauwanan sa iyang tim-os nga mga balak. Siya ang iyang magdadasig. Unya, nawa si Eliza pagkalit sa ilang lungsod. Nawad-an siyag kadasig, apan nakabawi ra sa pagpangabot sa laing mga adlaw. Nagpadayon siya sa pagsuwat. Napatikan sa mga basahon ug nakadaog og mga ganti sa bangga sa panuwat.

Human madawat ni Jose ang nasudnong pasidungog sa iyang pagka magsusulat sa usa ka hotel sa Manila may miduol niyang babaye. Nakalitan siya. Si Eliza!

Nagkumostahay sila. Nagkasabot. Gipahimuslan nila ang higayon sud sa motel. Usa na ka doktora si Eliza nga umaadto sa States kay naghuwat ang iyang fiancé.

Kalit siyang nawa kuno tungod sa panagbuwag sa iyang mga ginikanan. Sa Manila siya gida sa iyang amahang businessman. Nakabasa siya sa mantalaan sa national award ni Jose. Naghilak si Eliza nga nanaog sa motel. Si Jose igo lang misunod pagtan-aw sa nagkalayong bayhon sa babaye nga nakahimo niyang malampusong magsusulat. (Katapusan)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph