PANGANDOY sa mga bata ang makasuroy sa Disneyland ug makita sa personal ang paborito nga mga character sa mga salida sa Walt Disney Pictures.
Sa higayon makita na sa aktwal ang paborito nga cartoon character, tumang kalipay ang makita sa nawong sa mga bata.
Ug kini maghatag usab og kalipay ngadto sa mga ginikanan, kalipay nga dili mabayran.
Sama kini sa gibati ni Daniel J Kara nga nakakita sa iyang paborito nga cartoon character, si Lightning McQueen, usa ka adlaw sa dili pa ang kasumaran sa iyang adlaw nga natawhan niadtong Disyembre 31, 2017, atol sa ilang pagbisita sa Hong Kong Disneyland.
Sa maong lugar gisaulog sa mga ginikanan ni Daniel nga sila si Saar, 43, ug Charmaine Janis Rodriguez-Kara, 40, ang 4th birthday sa bata.
Ikaduhang higayon na kini nga nakasuroy si Daniel sa Disneyland, apan sa unang suroy nila niadtong Hunyo sa 2017, wa kini hingpit ma-enjoy sa bata kay gadali sila sa oras ug igo ra sila nanakay sa rides.
Nagdali usab sila kay may bagyo sa Hong Kong niadtong higayona.
Alang ni Charmaine, sa mga biyahe, gawas nga malingaw ang bata, mahinungdanon usab nga dili niya makalimtan ang mga kasinatian sa pagsuroy sa Hong Kong Disneyland.
“When you travel, ang feeling sa bata ang imong agdon. Dili ang mga dagko nga molahutay. Kay kon kapuyon nana siya, dili na niya ma-enjoy ang iyang mga makit-an,” paambit ni Charmaine, tigpamaba sa Metropolitan Cebu Water District.
Kay Christmas season dihang niadto sila sa Hong Kong Disneyland sa ilang ikaduhang pagbalik, duha ka parade ang ilang naabtan, usa sa hapon ug usa sa gabii.
Sa usa sa mga parade, aktwal nakit-an ni Daniel si Lightning McQueen, ang iyang paborito nga character sa salida nga “Cars.”
“Pagkakita niya ni Lightning McQueen wa siya kasabot unsa iyang buhaton. Magsige siya og tawag namo iyang mama ug papa bisan og naa gud mi tapad niya. Sige siya og tudlo ni McQueen, worth it gyud nga experience,” saysay ni Charmaine.
Si Daniel gihatagan og Lightning McQueen nga duwaan sa iyang amahan isip gasa sa iyang birthday samtang si Charmaine kay clay ug awto nga duwaan.
Human sa tulo ka adlaw nga bakasyon sa Hong Kong, nilahos ang pamilya ni Daniel sa Israel, ang yutang natawhan sa iyang amahan. (SCG)