KON makahurot ka og 64 kabuok ka siomai, libre imong kaon sa Unli Siomai sa Balay sa Barangay Tisa, dakbayan sa Sugbo.
Ang ni-trend nga unli siomai, gidagsa sa mahiligon og siomai ingon man katong nakuryuso usab nga motilaw.
Ilhado ang siomai sa Barangay Tisa apan una ang managsuong Nadera nga niabli sa unli siomai.
Matod ni Marell Nadera, usa sa tag-iya, homemade ang ilang siomai ug haom usab kini sa pangan sa ilang kan-anan nga Unli Siomai sa Balay.
Ang Unli Siomai sa Balay nahimutang daplin sa dalan sa Sapphire St., Sta. Teresita Village ang maong kan-anan. Tuyuon kini apan makasud ra ang mga sakyanan.
Sa P100, makakaon na ka og unli nga siomai, puso ug bottomless iced tea.
Marso 8 dihang opisyal nga gilusad ang maong kan-anan apan sa wala pa sila mamalhin, didto sa panimalay mismo ni Marell ang kan-anan.
Apan tungod sa dagsa sa tawo, nibalhin sila ug anaa na sila sa Sapphire St.
Dihang nagsugod sila niadtong Marso 8, didto usab nila natala ang labing daghang siomai nga nakaon sa ilang unang customer.
Nakahurot ang customer og 28 ka siomai, 15 ka puso ug usa ka pitsel nga iced tea.
Moabot sa 100 ka putos sa tag 64 ka siomai o 6,400 kabuok siomai ang mahurot nila matag adlaw.
Kon hilig ka og siomai, ganahan ka og unli, bisitaha na ang Unli Siomai sa Balay sa Tisa.
Abli sila alas 2 sa hapon hangtod alas 12 sa tungang gabii.
Modeliver usab sila, 5 ka packs ang minimum within Cebu City, 10 packs kon lagyo na, P350/pack.