AKO si Carel, 24, nagpuyo dinhi sa lungsod sa Villanueva, Misamis Oriental. Simple lang ko nga babae, dili gwapa pero kung tutukan ma-inlove ka. Joke! Hilig gyod nako ang magsayaw. Sa mga okasyon ug mga kalihokan anaa ko kanunay makita. Pila na usab ko ka beses nga miapil sa mga contest dili lang sa among lugar apan sa Cagayan de Oro, Iligan ug Davao.
Apan kining gugma diay moabot ra gyod ni sa imong kinabuhi bisan og dili nimo paabuton. Kini si Ric, akong kaila nga usa ka dance instructor.
Nagpuyo sa Cagayan de Oro. Gwapo si Ric, attractive siya tan-awon kanunay samot na kung mosayaw.
Matingala ko niya kay gatawgon ko niya og 'idol' nakadayeg pod diay siya sa akong ka maayo diha sa dance floor.
Sa pirmero dili ko gatagad ni Ric kay daghan ko gakamatikdan nga girls nga gapalibot kaniya. Nagtoo pod ko nga naa siyay uyab. Apan nagsugod ang tanan dihang nag-engkwentro mi sa contest didto sa Davao.
Naka third mi ato samtang second ang grupo ni Ric. Pareha mi og hotel nga gitsek-in ato nga time ug human sa contest naagni ko nga muoban sa laag.
Apan nakurat ko nga nawala among mga kauban ug resulta kami nalang duha ni Ric ang nahibilin.
Bisan asa mi nakapaingon ug didto sa usa ka bar nag-one on one mi og inom. Pag-uli namo sa among gi-stay nga room didto siya nakatulog sa akong rooom.
Nakurat ko dihang kalit ko niyang gihalokan. Tungod kay first time nako, mibalos ko. Bisan tuod tipsy ko atong tungora nakapugong ko sa akong kaugalingon ug nimata gyod mi sa kabuntagon nga walay nahitabo kanamo.
Nangayo siya og sorry pero ako siyang gipasaylo kay nibalos pod baya ko og halok niya. Nakurat ko dihang iyang gihuptan akong kamot ug niingon nga dugay na kaayo siya nakagusto nako.
Akong na realize nga mao diay kanunay nako siya makita kung asa ko magperform kay ako daw diay rason tungod sa iyang dakong gusto kanako.
Sa usa ka unibersidad dinhi sa Cagayan de Oro diin ko nagtungha kaniadto iya nako gakamatikdan apan wala gyod daw mi nahatagan og tsansa nga magkastorya.
Tuod man wala nako deretso nga gisugot si Ric apan sa iyang pagpakita kanako sa iyang dako nga gugma nakagusto ko kaniya.
Karon panahona mag duha na ka tuig among relasyon ug bisan sa mga unos nga among naagian malipayon ming duha. Hinuon wala pa mi plano mosulod sa kaminyuon.