WA MAGTUO si Miguel Cho, tag-iya sa 10,000 Roses Cafe sa Brgy. Day-as, lungsod sa Cordova, nga dagsaon ang iyang cafe sa publiko.
Ang cafe nga giablihan niaging semana, nahimong popular human ang Facebook post kabahin ani nag-viral.
Makita sa 10,000 Roses Cafe ang puti nga mga rosas nga adunay LED lights. Mosiga ang mga rosas inig gabie.
“I want to make this place a symbol of love,” matod ni Cho. Ang 29 anyos nga Korean interior designer nahinabi sa Superbalita Cebu kagahapon.
Plano niya nga palapdan ang cafe aron daghang makasulod.
“My intention for this place is, I want to make it a romantic place so that when a man brings his girlfriend he can propose to her here,” matod niya.
Way entrance fee ang 10,000 Roses Cafe apan kon adunay eksklusibong kalihukan sama sa kasal nga himuon dinhi, sirad-an kini sa publiko.
Sulod sa 1,500 metros kwadrados nga cafe nahimutang ang hardin nga gitugkan sa white LED roses.
May mga koral aron mabutangan og love locks (mga kandado nga nagtimaan sa panaghigugmaay sa duha ka tawo) sa mga manag-uyab o magtiayon.
Sa ikaduhang andana sa cafe ang view deck nga makita ang kadagatan ug ang Cebu City. Ang view deck gibutangan og tempered clear glass aron makita gihapon sa mga bisita ang palibot.
Sa view deck, pwede “magdamgo ang managhigugmaay sa ilang kaugmaon.”
Nakutlo ang ideya sa 10,000 Roses Cafe gikan sa hardin sa Dongdaemun Design Plaza, sa Dongdeamun Square didto sa Seoul, South Korea.
“When I saw that I wanna make something like that in the Philippines so I made a design of the project,” matod ni Cho.
Ang LED roses nga maoy una sa Pilipinas dili delikado sa mga tawo ug hayop sanglit 12 ka boltahe man lang nga kuryente ang gikarga niini.
Mapasalamaton
Dako ang pasalamat ni Cho sa mainitong pagdawat sa publiko sa pag-abli sa iyang cafe.
“Thank you for your visit here and I hope this place is the beginning of your love and (a place to) seal your love,” ni Cho.
Inspirasyon
Gitug-an ni Cho nga nahimo niya ang 10,000 Roses Cafe tungod sa usa ka espesyal nga tawo nga iyang inspirasyon.
Abli ang 10,000 Roses Cafe 10:30 a.m. ngadto sa 11 p.m.
Gawas sa kape, makapalit sab ka og cakes (mouse, chocolate ug cheese cakes), Italian food sama sa pasta, pizza ug panini, ug handmade chocolate atol sa ilang grand opening karong Marso 14.
Sa kasamtangan, mahimo kamong makadala og inyong gagmay nga padlock nga pwede ninyong ibutang sa “love lock fence.”
Apan sunod buwan mo-import si Cho og heart-shaped nga padlock gikan sa Korea. Kini nga klase sa lock masuwatan og pangalan.