DUNAY usa ka lungsod sa probinsya sa Leyte ang nindot bisitahon uban sa pamilya, barkada o ba kaha hinigugma bisan unsang panahon.
Mao kini ang lungsod sa Hindang sa probinsya sa Leyte, diin duna kini tulo ka gipasigarbong tourist destinations - ang Hindang Caves ug Wild Monkeys sa Mt. Bontoc ug ang sama sa paraiso nga Himokilan Island.
Gikan sa Ormoc City, mosakay lang mo og V-hire alang Maasin City apan naog lang mo sa Hindang. Usa ug tunga sa oras ang biyahe og P120 ang plite.
Hindang Caves ug Wild Monkeys
Gikan sa Hindang town proper, pwede ra mo mosakay og traysikol padung Barangay San Vicente diin nahimutang ang Mt. Bontoc.
Anaa sa P20.00 ang entrance fee, sa pagtikang nimo sa hataas nga hagdanan sa Mt. Bontoc, makita nimo ang labong ug tag-as kaayo nga mga punoan ug mabatyagan ang presko kaayong hangin.
“Way back 2007, sa ako paglingkod, nakita nako ang potensyal sa Mt. Bontoc nga mahimong tourist destination tungod sa mga langob ug mga unggoy,” matod ni Hindang Leyte Mayor Jun Cabal.
Tunga-tunga sa inyong pagsaka makit-an ninyo ang usa ka dakong langob nga gitawaga og ‘Cathedral’ diin gipalibutan kini sa mga stalactite ug stalagmite nga gipuy-an sa daghang kwaknit ug bugtong sihag sa adlaw ang naghatag og gamayng kahayag sa bugnaw kaayong palibot.
Gawas sa Cathedral, makit-an usab ang laing langob nga gitawag og ‘Lilion Cave’ nga igo ra mo makasuong apan mas maayong molili lang mo.
Duna pay laing langob gawas sa naunang duha.
Duna sab gihimong semento nga lingkoranan sa kilid sa hagdanan aron makapahuway mo kay taas kaayo ang sakaon.
Pero nindot na kaayo sa kinaibabwan kay overlooking sa lungsod ug kadagatan.
Mokabat usab sa 120 ka wild monkeys ang nanimuyo sa lugar, nabahin kini sila sa tulo ka ‘clan’; Ang Nilo, Golem ug Mahinlupin.
“Kanang Mahinlupin maoy mga isog, mag-away gud nang tulo ka clan. Duna na silay oras sa paggawas. Pero marunong ni ang Mahinlupin kay bisag di nila oras sa paggawas mogawas na kay naa man na sila suguon kun daghan ba og tawo ug daghan gani manganaog na sila,” matod ni Mario Ceniza ang caretaker.
Apan may mga gidili niini sama sa pagpakaon sa unggoy gawas lang sa caretaker, pakigtinutokay, paghikap, pagdala og plastic bags, pagbutang og flash sa camera, pagbugalbugal ug pagsaba-saba ug pasagad og aglabay sa basura, naay basurahan adto ilabay.
Zipline sa Leyte
Sa wala nga habig sa Mt. Bontoc, nahimutang ang bugtong Zip Line sa Leyte, duna kini gilay-on nga 740 metros ug 120 ka tiil gikan sa centerline. Kaya niini mokarga og 100 kilos nga tawo unya P180 ang bayad.
Gikan sa landing area, dunay motorsiklo nga mohatud ninyo pabalik sa entrance.
Ayaw kalimot inig uli ninyo, naay mga baligya nga souvenirs sa ubos. Wa lay pagkaon nga baligya busa pagdala nalang mo sa inyong mga pagkaon kay duna may lantay nga kakan-an.
Himokilan Island
Gikan sa mainland, mosakay lang mo og pumpboat padung Himokilan Island. P2,000 ang bayad padung ug pabalik pero sulit ra.
Mokabat sa 30 ngadto sa 35 minutos ang paglawig depende kun bawod o di.
Giseguro sab sa lokal nga kagamhanan nga matuman ang kapasidad sa pumpboat aron luwas ang mga turista.
Taliwala sa paglawig, makaginhawa mo og lawom kay makita man ninyo ang hilabihan ka lawom, asul ug limpyo nga dagat ug sa unahan maaninaw ang mala paraiso ug berhin nga isla.
Ang mga kalikupan berde kaayo ug wa makatilaw og pangabuso.
“Dunay 153 households diha unya wala puy-i ang uban kay gihimo lang bakasyonan. 552 ang tanan namuyo,” matod ni municipal councilor Romulo Basañez.
Di lang kay isla ang nindot, hasta ang mga nanimuyo maayo kaayo mo abi-abi sa mga bisita.
Way entrance fee pero pagdala lang mo og tubig mainom ug panghinawnaw ug ubang kinahanglan. Pwede ra mag-overnight ilabi na ang dunay kapuy-an pero og wala, pagdala lang mo og tent.
“Tubig uwan ra gyod ang ikaligo sa mga tawo unya ang ilang mainom adto sa mainland magkuha,” matod ni Barangay Kapitan Dominador Cavite.
Gitun-an karon sa lokal nga kagamhanan kun unsay buhaton aron mabutangan og potable water ang isla.
“Sapagkakaron naghatag ang LGU og rainwater catchers, tag P10, 000 ang usa aron ilang pundohan. Plano sab namo nga pamutangan og cottages,” matod ni Mayor Cabal.
Solar ang mga street light ug suga sa mga panimalay sa isla. Naay generator sets apan di buntagan.
Moabot sa 49 hektarya ang Himokilan Island, sakop kini kaniadto sa Cuatro Islas sa Inopacan, Leyte apan nabuwag human mapamatud-i nga sakop diay sa Hindang.