Tabang sa katawhan gikinahanglan

GIAWHAG sa Cagayan de Oro City Police Office (Cocpo) ang katawhan sa komunidad nga makigtambayong kanila aron pakigbatokan ang kriminalidad sa siyudad labina padangayon ang kapistahan ubos sa patron ni Sr. San Agustin.

Matud ni Police Superintendent Lemuel Gonda, hepe sa Operation and Plans Branch sa Cocpo, nga dako kaayo og papel ang katawhan sa siyudad aron makatabang nga masulbad ang mga kriminalidad.

Gibutyag niini nga basi sa criminal justice system, makita didto kung unsa ka dakong tabang ang komunidad sa kalampusan sa mga operasyon sa kapolisan ug tungod niini, iyang giawhag nga makigtambayong kanila.

Ning padangayon nga kapistahan, gimandoan na ang tibuok mga police station nga ipadayon ang base patrol ug kung adunay mga kadudahan, o mamatikdan nga abnormal nga sitwasyon ireport kini ug beripikahon.

Dugang niini nga nakaandam na usab ang tanan nga mga personahe nga mobantay labina sa mga kalihokan sa kapistahan.

Sa iyang bahin ni konsehal Ramon Tabor, kinsa chairman committee sa police fire and public safety sa konseho, niingon nga iya na gimando sa kapolisan ang hugot nga proteksyon sa siyudad batok sa mga hulga sa terorismo, mga pagpanulis ug uban pa nga posibleng makapasamok sa kasaulogan.

Gibutyag niini nga malampuson ang kasaulogan niaging tuig ug gihinaot ni Tabor nga ipadayon sa kapolisan ang ilang gihimo kaniadto ug kung mahimo mas labwan pa. (SVB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph