MAINITON nga pagtimbaya kaninyo dala sa kainit niining El Nino. Musta? Inom ta'g daghang water (dili soft or any artificially flavored drinks aron likay sa diabetes) aron dili ta maughan og tubig sa kalawasan kay makadaot kini kanato.
Pagpangawat ang literal nga meaning sa "stealing." Mao ni akong nahuna-hunaan nga atong pagahisgutan kay nainspirado ko sa dihang nabasa nako ang assignment sa akong anak mahitungod sa gipamulong ni Sen. Mirriam Santiago nga ipabilanggo ang mga kawkawan sa gobyerno. Uyon ba mo? Ako pod.
Nakadungog na man kita sa daghaaaaaaan na nga higayon nga kining mga nagapapili aron "moserbisyo" sa katawhan; nahilambigit sa paggamit o pagpangawkaw sa pundo sa panggamhanan. Apan dili man lamang sila, bisan sa kanang mga yano nato'ng kaila nga nangempleyo sa balay o kompanya; nahulog pod nianing salaa - ang pagpangawat o paghilabot sa butang nga dili nato gipanag-iyahan.
Bitaw, apil mismo sa napulo ka sugo sa Ginoo (10 Commandments) nga, "Thou shall not steal." Dili lagi daw ta mangawat. Mao ang pagbuhat niini, usa gayud ka krimen atubangan sa Diyos.
Matod pa sa sinuwat ni Katherine Nettle nga artikulo sa www.selfgrowth.com, daghan kuno ang mga rason nganong mangawat ang tawo. Ang pinaka-common mao ang desperasyon tungod sa kalisod ug tumang kagutom. Ang uban nagapangawat kay aron pabida o tungod ma-excite sila. Duna pod nagapanghilabot sa butang sa uban tungod sa kondisyon nga "kleptomania" diin dili nila mapugngan ang kaugalingon nga manguhag dili ila. Matambalan na hinuon ni nga kondisyon pinaagi sa therapy, pagsabot ug tabang sa mga tawo sa palibot.
Ang uban mangawat tungod sa pagbati og kahaw-ang ug kakulangon mao manguha'g dili ila, igsuon. Naa pod nagapangawat kay "trip" lang. Nasayod sila nga kaya nila kining buhaton ug palusotan inig madakpan.
Nagatuo ako nga ang pagsulod sa ideya nga dautan sa atong ulo ug dughan nga mobunga og dili maayong aksyon - ispiritu kini sa kahakug nga nakakwintas sa atong liog, igsuon.
Ang pagpangawat dili lang limitado sa mga butang, migo (nakadungog na mo anang gi-ilogan og uyab o asawa?). Ang pagpamakak ug dili pagrespeto sa oras sa uban susama ra sa pagpangawat, inahan kaya dapat din na parusahan.
Kung mamakak kita, gihikawan nato ang uban nga masayod sa kamatuoran hinungdan nga dili magkadimao ang paggama nila'g desisyon sa kinabuhi, migo.
Ang paggamit pod sa oras sa uban o ang dili pagrespeto niini, pagpangawat gihapon kay gihikawan nato ang atong kasabot nga gamiton ang ilang oras sa ilang gusto nga pamaagi ug higayon.
Atong sabton nga ang tinuod nga katagbawan, anaa ra sa Ginoo, ug walay bisan unsang butang ang makatupong niini, migo. Tan-awa ng mga hakug dili ba sige gihapon og pangawat bisan daghan na kaayo sila'g gipanag-iyahan? Magpapili na gani utro ang uban karong umaabot nga eleksyon. Baga!!!
Moabot ra gayud ang oras sa gaba ug paghukom. Magbag-o na ta, igsuon samtang ana pa ang grasya sa Makagagahum kay kung magpabilin kitang gahi- mosangpot gayud kita sa dalan nga "hiwi."