MAAYONG adlaw, mga higala! Daw paspas lagi ang paglabay sa mga adlaw. Mora'g bag-o pa lamang alang kanako nahuman ang pasko ug fiesta sa amo.
Hello, Mister Cupido! Atong ipakanat ang gugma yes putli nga love, love, love, miga, sa bulan sa Pebrero ug dili ang pagpanguwag ang magpatigbabaw, migo.
Sosyal ra kaayo atong titulo no? Kanang “Versace” (bher-sa-che ang paglitok dili verseys) brand name o ngalan kana sa mga imported nga mga produkto nga sobra kataas ang presyo sama sa mga sinina, pahumot ug uban pa nga ginapalit sa mga adunahan ug kadtong nagpinamati nga datu, amahan.
Ang “Versace on the Floor” titulo sa kanta sa half-Pinoy nga si Bruno Mars nga bag-ohay pa lamang gipatukar sa kahanginan.
Gawas sa sosyal, maayo ang pagkahan-ay sa musika ug lireka ug hasta pod nindota sa tingog ni Bruno, migo.
Apan kung atong himayon ang matag-linya sa kanta ug sabton sa kinatibuk-an ang mensahe, nagtuyok kini sa kagustohan sa usa ka lalaki nga makighilawas sa usa ka babaye nga nagsuot og nindot ug mahalon nga sininang Versace.
Matud pa sa kanta, bisan nindot ang sinina sa girl dili na kini kinahanglan kay sa salug ra man gihapon ang kapadulngan inig ang duha ka binuhat maghalog na, inahan.
Nganong ako ning gihisgutan? Simple lang ang akong katuyoan – ang pahinumdoman ang mga kababainhan nga tagaan og labaw nga bili ang kaugalingon ug dili magpadala sa pagka-uwagon.
Mahal tuod ang mga sinina nga dunay tatak nga Versace apan labaw'ng bililhon ang atong dignidad ug pagkatawo (dili kinatawo) ilabi na sa mata sa atong Ginoo.
Ang uban man god inig Valentine's Day mora'g magkinaiya og iro. Paunsa? Kana god mahilig mopatong (makighilawas) bisan asa o kinsa (minyo man, ulitawo o dalaga). Kanang maabtan sa kauwagan daw mora'g irong-buang nga mangita dayon og kapaslakan sa ilang “hinagiban.”
Kitang mga tawo aduna gayud mga kakulangan ug kahuyang. Dunay mga panahon nga ang atong pagbati daw dili gayud mapugngan mao kita magsalimuang.
Sa panahon sa atong kaluyahon, sangpit kita sa Ginoo, igsuon. Bisan unsa man god ang atong paningkamot nga magmatarung, ang Diyos ra gayud ang adunay gahum nga makabag-o kanato, igsuon.
Nindot pahinumdom ang maong kanta sa mga babayeng humok kaayo'g ilong nga kon mag-iniro kita'g kinaiya - mas taas pa kanato ang presyo sa sinina.
Pugong-pugong ug isip-isip pod pag may time.