Talikala: Berdugo sa tiunay nga panerbisyo

KINSAY nagtuo nga ang usa ka ba­baye maoy makapahawan ug makapalim­pyo sa labing dako nga merkado sa Sugbo?

Ang responsabli sa pagpatuman sa dagko nga mga clearing operation ug re-blocking sa mga nasunogan sa dakbayan ilabi na sa mga danger zone ug public lot nga gipuy-an sa mga illegal settler.

Siya si Raquel Arce, 50, market administrator ug officer-in-charge (OIC) sa Prevention Restoration Order Beautification Enhancement (Probe) nga maoy bugtong babaye sa Cebu City Government nga naghupot og duha ka buhatan.

Siya ang gitawag sa mga ubang mga vendor og ‘berdugo’ nga gipaluyohan sa mga militante sanglit wa siyay gikahadlokan gawas sa Ginuo mapatuman lang ang mando sa iyang labaw nga alang sa kaayuhan sa katawhan.

Si Raquel, anak ni Elino ug Jacinta Bohol ug kamaguwangan sa unom ka mga anak kinsa adunay lima ka mga anak ug tulo ka mga apo.

Sa wa pa nahimong market supervisor IV si Arce nga maoy plantilla position sa market administrator, nagsugod usa siya sa labing ubos nga ranggo isip administrative aide 1 nga adunay P25 nga sweldo niadtong 1988 sa panahon ni kanhi Mayor Tomas Osmeña.

Human niadto nahimo siyang administrative assistant, administrative officer ug exe­cutive assistant ubos sa Office of the Ma­yor.

Hangtod nga adunay kahigayonan nga niabot ug iyang gipili nga moubos ang iyang sweldo niadtong 1995 diin siya nahimong regular employee apan clerk III ubos sa Office of the City Administrator.

Paglabay sa duha ka tuig, ni-apply siya aron mahimong revenue collection officer 1 sa City Treasurer’s Office ug gidestino sa Pardo Public Market.

Sa tuig 2000, nahimo siyang secretary sa Market Authority, ang policy body sa merkado diin iyang amo si anhing Elpidio “Jojo” dela Victoria nga ma­oy market administrator hangtod nahimo siyang hepe sa economic enterprise revenue collection division sa CTO.

Dihang gipusil patay si de la Victoria niadtong 2006, siya ang gitudlo ni Osmeña nga acting market administrator ug nahimong full pledge market admi­nistrator niadtong 2007 hangtod karon.

Merkado

Si Arce nihulagway nga niadtong pa­nahon ni Osme­ña, di ka­ayo si­ya ma­ka­li­hok kay me­nos ang suporta sa Office of the Mayor ngadto sa iyang buhatan.

Apan paglingkod ni Mayor Michael Rama niadtong 2010, didto niya natagamtaman ang tiunay nga panerbis­yo sa merkado nga hangtod karon padayon ang paglambo.

Gikonsidera ni Arce nga labing dako nga misyon sa iyang pagka-market administrator mao ang pagpabalik sa two-way traffic sa MC Briones nga kanhi one-way ug maglisod pa og agi ang mga sakyanan gumikan sa mga stall ug tinda.

Gihatagan siya og 15 ka adlaw ni Rama apan iyang napatuman sud sa usa ka buwan diin giputlan ang mga tindahan nga nilapas sa karsada samtang ang uban gibalhin og laing pwesto.

Ikaduha mao ang Taboan Public Market nga kanhi gihimong katulganan sa mga bugoy apan karon usa na sa mga tourist destination uban sa pag­panindot sa palibot ug pagbutang og koral ug katapusan mao ang Pardo Public Market nga kanhi gihimo usab nga extension sa eskwelahan.

Sapagkakaron, ang kalimpyo sa mer­kado ug kaluwasan sa mga mamalitay maoy prayoridad ni Arce uban sa panghinaot nga mahuman na ang katukoran sa Unit II nga nasunog niadtong 1998.

Probe

Niadtong 2012 nagsugod si Arce isip OIC sa Probe diin daghan na og kalampusan ang iyang buhatan.

Sila ang usa sa mga responsabli sa mga re-blocking sa mga lugar nga nasunogan, clearing operation sa Doña Pepang cemetery, Lorega San Miguel, Bato Ermita, Warwick Barracks, Tejero, Labangon, Mambaling, Mahiga Creek, road restoration sa Capitol Site ug daghan pa.

“Wala gyud ko nagkuwang og sangpit sa atong Ginuo nga unta protekta­han ako ug kuyogan ko niya especially sa dinagko nga clearing operation nga unta hikapon ug humokon ang kasingkasing sa mga hingtungdan nga di sila magpadala sa kainit ug masabtan nila ang ilang trabaho,” saysay ni Arce.

Sila usab ang naghawan sa Citi Center nga kanhi gipuy-an sa daghang mga tawo nga adunay gihimong ilegal ug maoy nakapausab sa imahe sa Barangay Kamagayan.

Ug ang kontrobersyal nga pagguba sa center island sa Labangon nga maoy hinungdan sa pagkasuspenso ni Rama nga giingong giapilan og pulitika.

Gihulagway ni Arce nga di sayon ang iyang trabaho sanglit daghan siya og mga hulga sa kinabuhi ilabi na human sa operasyon sama sa ilang demolition sa Unit-II dihang gisugdan kini og trabaho, Warwick Barracks ug Sityo Bato nga pulos nahimutang sa Ermita.