Tambagi ko Noy Kulas: Biseklitas

Dear Noy Kulas,

Just call me Mendy, minyo na ug dunay duh aka mga anak. Ang akong problema parte ni sa marriage namo sa akong bana nga bata lang gihapon og huna-huna.

Sa wa pa mi maminyo, daan na siyang hilig sa motor ug biseklita. Kaingon nako di na siya magpalabi aning bisyuha kon maminyo na mi kay naa nay responsibilities diri namo. Pero nasayop ko.

Kada weekend, wa siya diri sa among balay kay mobiyahe sa probinsiya magmotor kuyog sa iyang mga barkada. Sa Dominggo, mountain bike ang iyang bisyo ug usahay hapit na gabii mauli kay layo ang iyang biyahe. Ako na siyang giestoryahan ini, apan motubag ra siya nga mas maayo na lang mao na ang iyang bisyo, di babaye.

Usahay mahug na namo ni nga away kay ma-irritate ko usahay nga mas importante pa niya ang motor ug biseklita kay sa among mga anak.

Pareho mi nga nagtrabaho pero ako sa weekends, naa ra sa balay naghikutar sa mga bata samtang siya nagpahayahay kuyog sa iyang mga barkada. Noy, unsaon kaha ni nako og badlong ang akong bana nga di magpalabi aning iyang bisyo. Wa pa ni siya mo-mature ? Bata bataon pa ni og huna-huna nga kining kaminyuon unta di duwa-duwa. Di siya makasabot sa akong sulti niya. Mabadlong pa ba ni? Daghang salamat sa imong tambag.

MENDY

Mendy,

Lisod badlungon ang tawo kon nagtuo siya nga husto ang iyang gibuhat. Kana kay niingon siya nga mas maayo ang iyang gibisyo kay kana ra, di babaye o inom. Partly, sakto siya sa iyang gisulti. Mas maayo pa nang motor ug bisek­lita kay sa namabaye siya. Para sa health usab na niya.

Ang iya lang kay nasobraan. Instead nga di palab-anan ang mga oras sa pagsuroysuroy sa motor ug pagtindak sa biseklita, iya ning gihimo. Aron di mahimong away, ingna siya nga mokuyog kag panagsa sa ilang mga ride. Unya, hangyoa siyang palitan ka og mountain bike aron makakuyog ka og panagsa nila. Ayaw lang usab pirmeha. Kadaghan na ko makakita og magtiayon nga magkuyog sa motor ug biseklita. Kaila ko sa pipila nila.

Pinaagi tingali ini, ma-cut sa hinayhinay ang nalab-anan ra usab niyang lingawlingaw. Manghinaut lang ta.

NOY KULAS

(Alang sa imong problema, e-mail sa kulassuper@sunstar.com.ph ug rojval69@yahoo.com)