Dear Noy Kulas,
Grasya ug kalinaw diha nimo, Noy! Ako si Mr. J, 37, usa ka biyudo, nagtrabaho sa usa sa mga BPO companies. Kining akong suliran parte ni sa akoang lovelife. Naa koy nakaila nga maanyag nga babaye nga taguon ta lang sa ngalan nga Annie, 24 years old.
Nagsugod ang among panagka amiga sa dihang nagkasakay mi sa bus paingon sa habagatang bahin sa Sugbo. Laktod nga pagkaestorya nagkasuod mi kay nagbinayloay mi og mga cell phone numbers ug nagka-dinner date na mi makausa.
Ako nang napadayag kaniya ang akong pagbati ug pag admire kaniya. Ang problema kay naa na diay siyay hinigugma sulod na sa tulo ka tuig. Misamot akong pagdayeg kaniya kay honest kaayo siya kay gisulti niya ang tanan mahitungud sa iyang hinigugma. Bisan ini, nisaad ko niya nga maghuwat ko ug mohunong lang ko sa paghuwat kon makasal na sila.
Mao ni karon akong suliran, Noy, Sakto ba kaha ning akong gibuhat nga nangulitawo ko niya? Apan wa ko masayod dayon nga naa na siyay hinigugma. Sakto ba ni nga maghuwat ko niya hangtod mag- usab og administrasyon? Anugon kon mo-surrender ko kay basin diay di sila ang magkadayon. O maayo ba hinoon nga ako na lang ni siyang hangyuon nga magtaban mi ug magpalayo ngadto sa dapit nga masaw-an namo ang kalipay sa paghinigugmaay?
Gisuwayan ko na nga kalimtan si Annie ug ang iyang cellphone number, apan lisod kay nakakulit ang iyang number sa ibabaw sa akong higdaanan. Di pwede nga akong gub-on ang double deck sa akong giabangang kwarto. Intawn tambagi ko, Noy, kay dili ko makatulog og tarong.
Daghang salamat, Noy Kulas.
MR. J
Mr. J,
Wa may dautan sa imong gibuhat kay wa ka man makahibawo nga naa siyay uyab. Karon nga nakahibawo ka na, ayaw lang una ipadayon ang imong tinguha kaniya. You remain as friends until mo-decide siya nga biyaan ang iyang uyab. Apan huwata, ayaw sulsuli nga buwagan ang iyang uyab kay di sab na maayo. Bisan uyab pa sila, angay kang morespeto sa lalake kay sahi ra sab kon ikaw ang naa sa iyang nahimutangan, di lalim.
Ayaw lang siya dad-a og date kay di usab maayo. Courtesy sab na sa usa ka gentleman ngadto sa isig kaingon. Kon di ka na makapaabot, hinayhinay sa pagpangitag lain. Basin ba sama sa usa ka hinog nga mangga, nagpaabot kang mapuwak gikan sa sanga, apan pagkatagak, lain ang nakasawo. Kana maoy hinuktoki.
NOY KULAS
(Alang sa imong problema, e-mail sa kulassuper@sunstar.com.ph ug rojval69@yahoo.com)