Tambagi ko Noy Kulas: Nakagusto

Dear Noy Kulas,

Ako si Wena, 16, estudyante sa 10th grade. Ang akong problema mao nga duna koy naibgang lalake nga classmate ra nako. Ako unta siyang sultihan sa akong gibati ngadto niya apan maora og masuko siya. Wa ko kahibawo kon nganong ingon ani siya nako.

Gusto unta nako nga magtinabangay mi kon dunay buhaton. Hangtod karon masuko gihapon siya nako.

Unsay akong buhaton para di siya masuko nako ug magkasinabtanay mi? Kay gusto nako nga makahibawo siya sa akong feeling ngadto niya. Gusto nako nga magkasuod mi.

Love nako siya. Ingon siya bati siyag batasan mao nga gusto nako siyang tabangan aron siya mausab.

WENA

Wen,

Ayaw pamugos kon di siya ganahan. Bisan kinsang tawo basta pugson, mosamot nga di ganahan. Bisan ikaw, kon di ka ganahan sa sugod pa lang sa mao nga tawo ug mamugos siya, mosamot ka ka turnoff. Mas maayo pa nga paundayunan mo ang iyang gustong mahitabo kay mas makadayeg pa siya nimo niana.

Tinuod, nindot nang makasulti ka sa imong gibati aron makagawas ang unsa may naa sa imong galamhan, apan kon di ganahan ang tawo nga imong nagustohan, ayaw lang gihapon ipamugos nga iya kang paminawon kay magkaaway ra unya mo.

Kon di siya gustong tabangan, iyaha sab na. Tahura siya kon mao nay iyang gusto. Sa laktod, di siya ganahan nga magkasuod mo. Basin di niya feel nga magkaamiga mo. Tan-awa nya, mauwaw na unya ka nga maghuna-huna karon sa imong gustong buhaton. Love mo siya, apan di man ka love niya. Kon gusto pa siya nimo, nakilig na unta siya. Siya ang naalkanse karon, di ikaw.

Ang batasan lisod usbon kon ang nahingtungdang tawo di ganahan nga mag-usab. Ang kausaban sa batasan usa ka desisyon nga pagahimuon sa hingtungdang, di sa uban.

Mahimo silang matabangan, apan kon di sila gustong abagan, wa kay mahimo.

Mas maayo pa, concentrate sa imong pagtuon. Ang importante mao ang imong ugma, di ang karon. Kanang gugma, sa imong edad, magbalhinbalhin pa na. Kana maoy timan-i.

NOY KULAS

(Alang sa imong problema, e-mail sa kulassuper@sunstar.com.ph ug rojval69@yahoo.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph