Dear Noy Kulas,
Ako si Melly, 22, ug bag-o lang nagtrabaho human sa hapit usa ka tuig nga pagpangita og trabaho.
Naa koy uyab, Noy, sud na sa tulo ka tuig. Open kaayo mi sa amoang relationship kay aprobado man sa among duha ka mga pamilya. Ingon mi niana ka suod. Karon lang mi nakaagi og grabeng trials tungod lang sa password sa iyang Facebook.
Maka open ko sa una sa iyang Facebook account, hasta sab siya sa akoa. Dihang nakabantay ko nga sa iyang company pictures nga dunay babaye nga pirme niyang tupad ug ako siyang gipangutana, sa kalit lang giusab na niya ang password sa iyang account. Nangutana ko niya nganong iya ning gibuhat. Tubag niya kay gusto siya og privacy ug di siya masuko kon usbon nako pud ang akong password.
Nasuko ko kay di ni ingon ani ang among sabot. Open mi to each other sukad pa sa among relationship. Amo ning giklaro. Di ba kaha tinuod ang akong pagduda nga duna siyay lain? Duna baya mi instinct kaming mga babaye. Unsa may imong tan-aw ani, Noy?
MELLY
Mel,
Posibleng tinuod ang imong pagduda kay iya ning reaction dihang nangutana ka niya kinsa tong babaye nga kanunay niyang tupad. Kon wa pa siyay gitagoan, di unta siya mohimo og lakang nga ingon niadto. Kana kay dunay kausaban sa iyang lihok, dunay naka-trigger ani. Way tawo nga mousab sa iyang naandan kon wa pa siyay gibuhat nga lain.
Sama sa uban, nag-expect ka og long term nga relationship. Nag-expect ka nga ang relationship, gawas nga molungtad, perfect sab. Bisan gani ang kaminyuon maputol man, unsa na kaha ang panag-uyab? Wa say perfect nga relationship tungod kay naa ra sa duha ka partner nga mo workout aron maayo ang dagan sa relasyon bisan sa ginagmay nga bikil.
Niini, naa ra nimo kon imong padak-on ang inyong away tungod sa password o imo siyang uyonan kon unsay iyang gusto. Hatagi siya og freedom sa pagpili unsay iyang gusto. Kon hinayhinay siyang magpalayo ug mausab, angay kang maalarma. Angay mo ba usab nga pugngan siya kon molingkawas? Hatagi usab siya og kagawasan kon gusto niya. Sakit man tuod, apan ayaw ipamugos ang imong kaugalingon.
Kay mao pa may pagsugod nimo, palig-ona ang imong career aron di ka magmahay nga giusikan mo ang panahon uban kaniya nga wa man diay kini klaro.
NOY KULAS
Alang sa imong problema, e-mail sa kulassuper@sunstar.com.ph ug rojval69@yahoo.com