Tambagi ko Noy Tikyo: Dunay mga anak

DEAR Noy Tikyo,

Ang akong problema bahin sa gugma. Ako diay si Jeany, 24 anyos, nagtrabaho sa call center.

Duna koy nakaila nga lalaki nga nahimo nako karon nga boyfriend kay we love each other. Duha pa mi ka bulan nga nagkarelasyon.

Ang nakaparat lang kay ang akong pamilya sa dihang nasayud di uyon ning tawhana tungod sa ilang nakitang hinungdan.

Kini man god siya dunay duha ka mga anak sa managlahi nga babaye. Wa kuno sila magkauyon sa mga inahan sa iyang mga anak busa nagkabuwag.

Mao ni ang wa mauyoni sa akong pamilya kaniya. Alang nila kay basin og paangkan lang ko ning lakiha sama sa mga babaye nga inahan sa iyang mga anak. Ilabi na nga nagtinguha lang siyang makig-live in nako ug way planong magpakasal.

Karon naglibog na hinuon ko ug mora og nadala ko sa akong pamilya bisan kon in love ko niya. Nahadlok na hinuon kong mo-commit niya.

Unsa may akong buhaton, Noy? Tumanan ko ba ang akong pamilya o sa akong uyab?

Jeany

****

Jeany,

Di man tingali sayop kon imong paminawon ug pamalandungan ang tambag sa imong pamilya kay alang man pod kini sa imong kaayohan.

Nabalaka man god sila nga basin og di magmaayo ang dagan sa imong kaugmaon uban ning tawhana gumikan sa iyang sitwasiyon.

Di ko nimo moingon nga buwagan nimo siya, ilabi na nga nahigugma ka niya, apan kinahanglan nga hatagan una nimo og panahon ang inyong tagsa-tagsa ka mga kaugalingon nga ilhon ang matag usa ninyo.

Kana man gong duha ka bulan, sayo pa kaayo kana aron nga mohukom ka na nga makig-uban niya forever. Kay duna man gani dugay nang nagkauyab, apan nagkabuwag gihapon sa kaulahian. Di hinuon tanan.

Busa mas nindot nga palawman mo pa ang pag-ila sa pagkatawo ning imong boyfriend karon ug ayha ka pa mohukom sa imong kaugalingon.

Di pa man god nimo makita ang mga disadvantages sa pagpakigrelasyon kaniya kay naghinobra pa man ang imong gugma. Palugdanga una ang imong pagbati aron nga di ka "bias" sa imong desisyon.

Pananglitan, madawat mo ba ang pagbaton niya og mga anak sa laing mga babaye?

Kanang wala sab siyay klarong commitment nimo kay matud pa niya makig-live in lang siya nimo?

Kining mga butanga ang angay nimong ikonsidera diha sa imong paghatag sa imong hukom aron nga di ka unya magbasol sa kaulahian.

Kay basin unya og sakto ang imong pamilya.

rNoy Tikyo

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph