DEAR Noy Tikyo,
Ang akong problema bahin sa akong amiga. Tawga lang ko og Aiza, 24 anyos, dalaga.
Gikan ko sa Davao del Norte, ug nia dinhi sa Davao City kay diri ko nakakita og trabaho sa usa ka department store.
Nag-abang ko og boarding house sa may Boulevard. Kauban nako sa boarding house mao ang akong amiga nga si Janet, ka-edad ra nako ug may pagka-mestiza. Nagtrabaho siya og call center.
Nagkakuyog mi dinhi sa boarding house sulod na sa usa ka tuig. Busa di malilong nga suod na mi kaayo.
Sa maong gidugayon, wala gyud ko magtuo nga lesbian diay siya. Kay as in babaye man gyud ang iyang mga panglihok-lihok.
Ako na lang ning nadiskobrehan nga usa ka higayon niadtong Abril iya kong gigakos ug giromansa samtang nag-uban mi og katulog sa boarding house. Matud niya di na kuno niya maangtus ang iyang gibati nako.
Di gyud ko makatuo nga lesbian siya kay babaye man gyud siya tan-awon unya guwapa pa gyud.
Karon, uyab na mi.
Siya ang unang tawo nga nakahilabot sa akong lawas. Duna man tuod koy uyab kaniadto, apan kutob ra intawon sa gakos-gakos ug gunit sa kamot.
Angkunon ko nga duna mibati na sab ko niya og gugma ning higayona bisan og pulos mi babaye.
Unsay imong huna-huna, Noy, molampos kaha ang among relasyon?
Aiza
***
Aiza,
rDi na man talagsaon ang same sex relationship karon. Gani, bisan tuod og dunay daghang di mopabor niini, apan mora og hinay-hinay na man ni nga nadawat sa sosyodad ning panahona, di sama kaniadto.
Apan angay ninyong hunahunaon nga wala pa gyuy same sex relationship nga milahutay. Kon duna man, talagsaon na gyud kini. Kay moabot man gyud ang panahon nga usa kaninyo molingkawas sa maong relasyon ug mangita og opposite sex. Kay kini man ang gi-program sa Ginoo para sa tawo.
Busa sayo pa kaayo aron nga makaingon ka nga molampos ang inyong relasyon. Sa tan-aw nako sobra bulan pa mong nagkarelasyon niining lesbian nga imong amiga. So, di pa angay nga moingon ka nga siya na gyud ang imong unongan sa tibuok mong kinabuhi.
Noy Tikyo