WALA makaipsot sa mata sa katawhan ang nagbahang debotos nga mikuyog sa Solemneng Prosesiyon ni Mama Mary sa Guadalupe sa miaging Disyembre 11, Dominggo ug Bisperas sa Kapistahan sa patrona sa Sugbo.
Napuno ang plasa sa nanggawas nga nanimbahay, kinsa miapil sa hinayng dagan nga sulog sa prosesiyon nga gisugdan alas 5:30 sa hapon. Labihan kataas ang kutay sa mga anino nga nanglakaw subay sa Rota sa Prosisyon nga duha ka beses gipublikar sa Superbalita: ang una, sa petsa 9 sa Disyembre ubos sa kolum sa Mga Balita ug ang ikaduha, sa petsa 10 ubos sa kolum sa Komunidad.
Milungtad og tulo ka oras ang pagparada ni Mama Mary sa mga giandam nga dalan nga Iyang giagian. Nagsugod kinig alas 5:30 sa gabii ug natapos sa alas 8:30 sa gabii. Sobra kadaghan ang nanguyog. Mas grabe kadaghan kon ikomparar sa nangaging katuigan.
Dili kay kini lang ang nahitabo. Sa miaging petsa 10 sa Disyembre, Adlaw sa Konpirmasiyon, nagpunsisok sab atubangan sa altar ni Mama Mary ang 500 nga mga bata ug batan-on ang nagpakonpirma sa Obispo.
Kaniadto, sumala pa ni Sis. Eta Sacamay, katekista sa Guadalupe Parish Church, ang sagad magpakonpirma kutob ra sa 200. Pero karon labaw pa kay sa gidoble.
Gikalipay sa Team of Pastors sa Guadalupe Church ang pagkapatik sa mga Kalihokan bahin sa ilang Kapistahan dinhi sa panid sa Superbalita, diin miani kini ug nag-awas-awas nga kalamposan. Busa, ang lider sa Team of Pastors, Fr. Manuel Tan ug iyang kaubanan, kinasingkasing nga mipasalamat sa Superbalita, sa Editorial Staffs ug labaw na gayod, ngadto kang Dodong Morallo, ang Tagdumala sa Komunidad Kolum. (PR)