ANG Team Tin 24 ug Cuties of the Ateneo de Davao University mikampeyon sa Gaisano Mall Adidas 3-on-3 Basketball Challenge 2016 didto sa Gaisano Mall of Davao Atrium.
Ang Team Tin 24, gidumala ni Erian Daja, midaug pinaagi sa point system sa single round-robin format sa torneyo aron makadawat og tropeyo ug P10,000 kantidad sa premyong kuwarta ug gift certificates (GCs)/gift packs.
Mga batos ni Daja nga sila si Christopher Jatico, Jean Marie Mipouma Jr. ug Marvin Carl Latoza mipukan sa Elite Apparels, 13-8, human napakyas sa AC3F1, 15-17.
AC3F1, nakatilaw og 11-13 pildi sa kamot sa Elite dribblers, kinsa nabutang sa runner-up.
Ubos ni Coach Christian Quiamco sa AC3F1 gidulaan nila Bambi Plaza, Neil Dagpin, Jay Castillon ug Jay Pongtad.
Nakakuha sila og P8,000 kuwarta ug GCs/gift packs samtang ang Elite Apparels miuli og P6,000 ug GCs/gift packs.
Samtang ang Cuties Addu gipalukapa ang Cross Horse ug HCCS Captains aron masungkit ang titulo sa High School dibisyon sa pagpaluyo nila Elwin Toraja, Kiah Thomas Ay-ad, Christian San Diego ug Daniel Fanlo.
Sa Grade School category, mihari ang Panabo batok Pansit sa Bilao ug Brothers alang sa ikaduha ug ikatulo sa maong puwesto.
Ang pangbato sa Panabo mao sila Ryan Dioso, Stephen Roferos, John Salobre ug Josh Azon.
Ang Most valuable players (MVPS) nakadawat sab og Adidas shoes sa kantidad P4,995 matag usa diin sila Mipouma, Toraja ug Salobre ang gipangalan sa maong award.
Pahayag ni organizer Kenneth Sai sa Vantage Sports Promotions nga 95 ka tims ang nagtigi sa tulo ka adlaw nga torneyo nga gitugotan sa Samahang Basketbol ng Pilipinas (SBP) Region 11.(MLSA)