TENSYON tali sa mga opisyal ug mga residenteng nasunogan sa Barangay Guizo ug Mantuyong, Mandaue nitumaw human wa magkasinabot ang duha ka kampo sa planong site development sa dakbayan sa 9.2 ektaryang lugar nga nasunogan.
Pipila ka mga residente ang nipadayag sa ilang pagsupak sa ilang plano tungod kay nahadlok kining mapahawa sa ilang lugar.
Reblocking
Kagahapon sa buntag, gisugdan na sa dakbayan sa Mandaue ang unang hugna sa site development sa dapit nasunugan nga mao ang pagbutang og filling materials sa lugar usa kini himuan og road network ug i-reblocking aron sa pagtarong pagpahiluna sa mga biktima sa sunog niadtong Marso 12.
Tuyo niini nga patas-an ang maong dapit nga kilid sa sapa aron di na bahaon panahon sa uwan, sa samang bahin, kini himuong luwas nga puy-anan sa mga residente panahon sa emerhensya ilabi na kon may motumaw nga sunog.
Atol sa backfilling kagahapon, dismayado ang usa ka grupo sa mga homeowners association tungod kay matod nila pulos sa pulong lang ang mga pasalig sa Dakbayan nga di sila papahawaon sa maong lugar.
Buot sa presidente sa Federation of Mandaue City Uban Poor Inc. (FEDMACUPI) nga si Norma Garbo ug kauban niining board of director (BOD) sa pederasyon nga si Rosalinda Rello nga ipahunong una ang backfilling operation hangtod nga makapasalig ang kagamhanan sa dakbayan pinaagi sa memorandum of agreement (MOA) nga hatagan silang mga residente og temporaryong relocation site ug nga sila makabalik pagtukod sa ilang mga balay sa dapit.
Nagtinubagay
Ang duha nakigtinubagay ni Atty. John Eddu Ibañez sa city legal office sud sa Guizo Barangay Hall nga ipahunong una ang operasyon.
“Mosugot mig reblocking, tambakan nila ug filling materials kon naa tay MOA kanus-a mi makabalik o kon makabalik pa ba mi,” matod ni Jaime Baga, vice-president sa FEDMACUPI.
Gireklamo sab sa grupo inubanan sa ubang mga residente ang matod pa kakuwang og koordinasyon sa Dakbayan kabahin sa plano sa maong lugar.
Apan gihimakak ni Ibañez ang maong mga pasangil.
“Unfortunately, sayop na ilang mga gipang-istorya kay sa una diri ta. Even before, way back nagsugod atong kalamidad sa siyudad, way back March, nagsige natag invite nila with the discussion together with the heads and owners of homeowners association within 9.2 hectare lot (nga nasunog)...” matod ni Ibañez.
Matod ni Ibañez nga sayop ang maong grupo sa ilang mga pasangil tungod kay nihimo og konsultasyon ang ilang buhatan sa tanang residenteng apektado sa sunog nga miugdaw sa kapin 500 ka balay.
Mi-file para TRO
Kagahapon sa hapon, ni-file usab og injunction alang sa temporary restraining order (TRO) ang kampo sa FEDMACUPI pinaagi sa ilang legal counsel nga si Atty. Erwin Heyrosa sa korte alang sa pagpahunong una sa backfilling nga operasyon.
Kapin sa 40 ka mga sakop sa Mandaue City Police Office (MCPO) ug pipila ka mga sakop sa Traffic Enforcement Agency of Mandaue (TEAM) ang mibantay sa backfilling operation nga nagsugod Pasado alas 9 sa buntag kagahapon.
Naka-standby usab ang usa ka firetruck duol sa Cebu International Convention Center (CICC) nga gamiton kon may kagubot nga motumaw.
Gibutyag ni Ibañez nga human nila masuta nga pipila ka mga residente ang nagtukod pagbalik ug balay sa lugar bisan wa pa nahuman ang site development, nihatag dayon sila og “notices to vacate ug notices to demolish their own structures” sa mga residente niadtong Huwebes.
Plano sa dapit
Sobra sa dos mil ka pamilya kinsa kasamtangang gipapuyo gawas sa CICC ang apektado sa dakong sunog sa dapit niadtong Marso.
Human sa hitabo, plano sa Dakbayan sa Mandaue nga mohimog reblocking sa dapit aron kini mahumuan og saktong dan panahon sa emerhensya.
“Sa milabayng buwan, ang mga biktima sa sunog nakadawat usab tag P10 mil alang sa mga tag-iya og balay ug P5mil sa mga nag-abang ug sharers gikan sa kagamhanan sa Dakbayan isip tabang-pinansyal.
Nasuta ning mantalaan nga pagdawat sa mga residente og ayuda, may waiver silang pinirmahan nga di una magtukod pagbalik sa ilang mga balay sa dapit hangtod nga mahuman ang reblocking sa dapit nasunugan.
Kahinumdoman nga sa milabayng buwan pa unta sugdan ang site development apan wa madayon human pipila ka mga residente ningbabag busa ang filling materials gibutang una daplin sa karsada.
Si city engineer Andres Suson sa dihang nahinabi sa mga tigbalita niadto nagkanayon nga molungtad og 4 ka buwan ang site development kon way babag.