BUGAS, pakig-istorya sa maayong mga plano sa mga mag-uuma ug ang hisgutanang mga proyekto nga maoy tubag sa nagpadayong El Niño.
Kini ang pipila lamang sa mga tumong ug katuyoan sa dul-an 4 mil ka mga mag-uuma sa North Cotabato, apan misanggo kini sa duguong protesta nga mipatay og duha ug daghan ang mga samaron, niadtong Biyernes didto sa Barangay Lanao, Kidapawan City.
Apan, kagahapon sa udto, subling miulbo ang tensyon tali mga raliyesta ug miyembro sa dispersal team sa Philippine National Police (PNP) human subling nagtapok ang mga mag-uuma kay gustong kuhaon ang mga bugas sa buhatan sa National Food Authority (NFA) sa dakbayan.
"Matawag gayud nga duna na po'y tensyon kay sa among pagtapok, giharangan naman sab mi sa atong miyembro sa kapulisan," sulti ni Jerry Alborme, tigpamaba sa Kilusang Magbubukid ng Pilipinas (KMP) nga nahinabi sa Sun.Star SuperBalita kagahapon pinaagi sa telepono.
Dugang ni Alborme nga nagpadayon sila sa pag-ihap sa mga mag-uuma ug pagpanglista sa miuban sa rally aron mao unya ang basehan sa pagbahin sa mga bugas nga gikan sa katawhan sa dakabayan sa Davao.
"Gipanglista namo karon, madala namo ni nga bugas kay gikan mani sa katawhan," ingon ni Alborme.
Sumala niini nga di pa sab manguli ang mga mag-uuma gumikan ilang gihulat ang tabang nga pinansyal gikan kang Davao City Mayor Rodrigo Duterte.
"Gihulat pa namo ang tabang nga gipasalig ni Mayor Duterte, aron makatabang sa pagpalambo sa mga pananom sa kabukiran nga maoy kakuhaan sa panginahanglan," sumpay ni Alborme.
Gisulti sab sa tigpamaba nga nahitabo kagahapon sa hapon ang usa ka press conference didto sa dapit nga gitambongan sa mga nagkadaiyang progresibong pundok.
"Pinaagi niini, nadungog sa mga lideres sa kagamhanan ang among tingog, naa ang mga partylists mipaluyo namo," ingon ni Alborme.
Sa kasamtangan, padayong anaa sa dapit ang mga mag-uuma kinsa nagmantinir sa mga donasyon gikan sa katawhan nga gihatag kanila pinaagi sa mga simbahan ug pipila ka pribadong pundok.
Hinuon, wa misangko sa usa ka mainitong tensyon ang pagbarikada kagahapon sa hapon. (JPC)