Tigkatkat og lubi gipatay

MATANAO, Davao del Sur -- Patay diha-diha ang usa ka tigpangatkat og lubi human gipusil didto sa Sitio Latian, Barangay Asbang, alas 10:00 sa buntag, Martes.

Ang biktima giila nga si Arnel Gomez Alcain, 29, dunay kapuyo ug tigpangatkat og lubi sa lugar.

Giila ni Chief Inspector Elmer Cabuslay, hepe sa Matanao Police Station, ang suspek nga si Jimboy Saling Saluntay, hingkod ang pangedaron nga sakop sa Tribung B'laan didto sa Sitio Bukaypagang sa lungsod.

Matud ni Cabuslay, namupo og lubi ang biktima sa umahan ni Rudy Lescano apan sa pagkanaug niini, sa punoan kalit lang nga gipusil sa suspek ug namatay.

Nasayran nga migamit ang suspek og 12-gauge shotgun sa pagpatay sa biktima.

"Nasuko ang suspek kay nganong giprenda og P5 mil ang mga lubi ngadto sa mga Lescano gikan sa wa matinong tag-iya, siguro gusto aning suspek nga sa ila iprenda mao nadamay ang laborer sa bikil sa umahan," pasabot ni Cabulay.

Naglusad na ang kapulisan og manhunt operation aron masikop ang nisibat nga suspek dungan sa paghikay og kasong murder batok kaniya.

Apan si acting Mayor Elmer Javelona mibutyag nga nagpabiling malinawon ang lugar ug isolated case lang ang nahitabo.

Apan giangkon niini nga adunay mga bandidong B'laan ug mga wanted nga kriminal ang nagtago sa dapit. (Orlando B. Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph