MAESTRA sa dakbayan sa Talisay ni-report sa kapulisan sa Talisay tungod sa iyang kahadlok human giingong gisulong siya sa amahan sa iyang tinun-an nga iyang gihagbong.
Nahitabo kini sulod sa Talisay City National High School niadtong Lunes sa hapon.
Ang magtutudlo nga mi-report sa Talisay Police Station giila nga si Merciditha Espinosa, 27, taga Barangay Linao sa maong siyudad.
Sigun sa iyang asoy ngadto sa kapulisan nga padung na unta siyang mopauli sa dihang niabot og kalit ang amahan sa usa sa iyang mga tinun-an.
Giingong nidritiso kinig tulisok kaniya nga grabe ang kasuko dungan sa pagpangutana kon nganong iyang gihagbong ang anak niini.
Gitambagan niya ang amahan, kinsa naa pa sa kasuko, nga sa sunod adlaw na lang sila mag-estorya tungod kay mopauli na siya kay hapit na mag alas 6 sa gabii.
Inay mokalma, matod pa, nagpadayon gihapon ang amahan sa iyang tinun-an sa pagtulisok kaniya.
Gisuwayan sa pagpakalma ang amahan sa kauban niyang magtutudlo nga nakakita sa hitabo, apan giwakli usab kini.
Human sa hitabo, siya nakahukom sa pag-report sa kapulisan agig panagana.
Hinuon, wa nganli sa magtutudlo kon si kinsa ang iyang tinun-an nga iyang gihagbong.