HUGOT nga seguridad ang gikatakdang ipatuman sa kapolisan ug lain-laing ahensya atol sa kapistahan sa Itom nga Nazareno karong adlawng Martes denhi sa dakbayan sa Cagayan de Oro.
GIbutyag ni Police Senior Superintendent Robert Roy Bahian, City Director sa Cagayan de Oro City Police Office (Cocpo) niingon nga gimandoan na niya ang iyang tanan sakop gikan sa Police Station 1 ngadto Police Station 10 nga mag-alerto sa ilang tagsa-tagsa ka area ning dakong kasaulogan sa Romanong Katoliko.
Sa Enero 8 adlawng Lunes mga alas 9:00 sa gabii ngadto alas 10:00 sa gabii ibalhin ang imahe sa Itom nga Nazareno gikan sa Nazareno Parish ngadto sa St. Augustine Cathedral diin ipahigayon ang overnight prayer.
Adlawng Martes Enero 9 adlaw sa kapistahan mga alas 5:00 kadlawon magsugod ang prosesyon o translacion diin gibana-banang moabot sa 2 kilomtero ang kalay-on sa prosesyon ug gitouhang moabot sab og usa ngadto duha ka oras.
Ang rota nagikan sa St. Augustine Cathedral sa Fernandez St pawala sa Velez St.
Patoo na usab dayon paingon sa CM Recto Highway hangtod sa Nazareno Parish. Denhi dayon sugdan ang inoras nga Santos nga Misa kasaulogan sa Kapistahan.
Mga gidili
Nagpagawas usab og mga gidili atol sa prosesyon ang Cocpo diin usa niini mao ang gibawal nga pagdala og mga backpack, kalo, mga dark sunglasses, scarfs, hooded jackets, sudlanan sa tubig nga dili dayag ug mga kadudahan nga butang aron likay nga masita sa kapolisan.
Gidid-an usab ang katawhan sa pag-inom og ilimnong makahubog labina gayud ang pagsunod sa transalasyon nga ubos sa ilimnong makahubog.
Likayan ang pagsul-ob og mga mahalon nga alahas aron dili kini atraksyon sa mga mata sa kawatan ug mga isnatser.
Gidili ang pagsul-ob og tsinelas ug gisugyot nga magsul-ob og komportable diha sa pagsunod sa prosesyon.
Gidid-an sab ang tanan mga mamaligyaay sa kadalanan nga makababag diha atol sa prosesyon.
Likayan usab ang paghugaw-hugaw kon paghulog og mga basura atol sa prosesyon o bisan diha sa simbahan ug labaw sa tanan dakpon kadtong mga gapasiaw kalabot sa pagsiyagit og bomba.
Gihangyo sab sa Cocpo nga magdala kanunay og ID alang sa emerhensya ug kon adunay mga mamatikdang kadudahan text dayon sa numero 09364017888.
Kamandoan
SI Cagayan de Oro Mayor Oscar Moreno nagpagawas usab og memorandum kalabot niining dakong kalihokan diin gimandoan ang tanan nga mag-alerto.
Kini taliwala nga ubos ang dakbayan sa Martial Law aduna gihapon hulga sa mga terorista.
Giregulate usab kadtong mga mogamit og aerial drone ug kon mogamit niini kinahanglan magkuha una og permit gikan mismo sa Cocpo.