Tulis sa pawnshop palpak kay tag-iya misukol

ORMOC City - Ni­sang­pot sa pinusilay ang suway nga pagtulis sa usa ka pawnshop sa dan Avilles ning dakbayan kagahapon sa udto.

Way nadala ang tulo ka mga tulisan human sila naunhan pagpusil sa tag-iya sa pawnshop kay wa sila makabantay tungod sa tinted nga salamin.

Ang tulo ka mga tulisan nadakpan sa kapulisan, apan sa pagsuwat ning taho, wa pay gihatag nga ngan si PNP City Director Ferdinand Garay.

Usa sa mga suspek nasikop sa Brgy. Nadungholan samtang ang laing duha sa District 26.

Wa pay laing detalye nga gihatag si Garay sa mga sakop sa media.

Matod sa kapulisan, sa pagsira sa gwardiya sa pultahan, kalit nga dunay duha ka mga lalake nga ningtud niini ug nahayang ang gwardiya.

Gitionan ug gidis-ar­ma­han ang gwardiya sa duha gamit ang gituohang kalibre .45 nga pistola ug giabisohan nga di molihok aron way mahitabong dautan.

Ang tag-iya sa pawnshop nga diha sa sud sa cashier’s booth nakakita sa nahitabo.

“Maoy akong nakita ang sinaw kaayo nga armas unya ingon ko, uy si guard gitiunan,” asoy sa tag-iya.

Gikuha gilayon sa tag iya iyang kalibre .40 nga Glock pistol nga gibutang sa iyang duol ug unang nipabuto sa mga tulisan.

Nabuak ang bildo sa booth human milusot ang bala niini.

Wa makabantay ang mga tulisan nga naa ang tag-iya kay tinted ang bildo sa booth.

Ningbawos ang mga tulisan apan wa makaigo sa tag-iya.

Niabante ang tag-iya ug nipabuto sa makausa hinungdan nga nikaratil pagdagan pagawas ang tulo.

Nipabuto pa og ka usa ang usa sa mga tulisan sa gawas ug nibawos pa og ka usa ang tag-iya hinungdan sa pagkabuak sa mga bildo sa atuba­ngan.

Nakadawat og impormasyon ang kapulisan nga nisakay sa bus ang mga tulisan busa giinspeksyon sa kapulisan ang mga bus nga mogawas sa Ormoc.

Ning buwana gitulis usab ang Brazilian Boutique sa dan Bonifacio pipila ka metros ang gilay-on sa police station 1.

Si Garay niingon nga ang ilang nasikop mao usab ang ningtulis sa boutique.

Related Stories

No stories found.
SunStar Publishing Inc.
www.sunstar.com.ph