WALO ka mga samad ang naangkon sa usa ka lalaki human giluba niadtong Martes, Disyembre 13, alas 12:24 sa Zone 3, Upper Agusan, dakbayan sa Cagayan de Oro.
Talandugon ang kahimtang ni Peter Ayong, 27, nagpuyo sa susamang dapit.
Sa nahipos nga report gikan sa Northern Mindanao Medical Center (NMMC) ning dakbayan, nasayran gikan sa inahan sa biktima nga paingon na unta pauli ang iyang anak apan sa pag-abot niini sa dapit diin nahitabo ang insidente gi-atangan kini sa suspek ug giduslak-duslak ang lawas.
Nakaangkon ang biktima og walo ka mga samad dinunggaban sa iyang tiyan, kilid ug dughan hinungdan nga kritikal kining nadala sa NMMC.
Gibutyag usab sa inahan nga adunay nakakita sa maong panghitabo kinsa nakaila sa suspek apan padayon pa kining gisuta.
Gisulayan sa SunStar SuperBalita og pakighinabi ang imbestigador sa maong kaso apan wala pa kini tubag sa pagsulat niini nga balita.