GATOSAN na ka mga kandidato ang malampusong nakaduso sa ilang kandidatora sa unang adlaw sa filing of certificate of candidacy (COC) base sa talaan sa Commission on Election (Comelec) sa dakbayan sa Cagayan de Oro.
Mokabat na sa 382 ang nakaduso sa unang adlaw nga naglangkob sa 29 ka posisyon sa kapitan, 239 sa Barangay Kagawad, 24 pagka SK Chairperson ug 90 ka mga SK Kagawad.
Nasayran nga ang labing una nga nakaduso sa iyang kandidatura sa pagka Barangay Kagawad mao si Victor Neri sa Barangay F.S Catanico, diin kadlawon pa anaa na kini sa buhatan sa Comelec.
Samtang sa ikaduhang adlaw una usab nga nakaduso ang kampo ni Ester Bade kinsa magpapili nga Barangay Kapitan sa Barangay 18 ning dakbayan.
“Usa nga akong platform is e-sulbad namo ang problema namo sa National Housing Authority (NHA), pagkatapos drainage gayud, naa po’y problema sa among constituents pud diha nga dugay na kaayo gi-reklamo wala gayud maaksiyoni, sa karon naka decide ko nga modagan og Kapitan tungod ana nga mga problema sa Barangay,”matod ni Bade.
Nagkadungan usab sa pagduso sa COC ang kampo ni Isais Dalay ug mga kagawad niini sa adlaw nga misudo si Bade.
Karong panahona padayon nga gi-aghat sa tinugyanan sa Comelec nga magduso na sa ilang kandidatura ang mga aduna’y plano nga magpapili karong umaabot nga eleksiyon nga mahitabo sunod bulan.