WAY tukoron nga underpass sa U.N. Avenue, dakbayan sa Mandaue hangtod dili pa maandam ang service roads sa isig ka habig.
Matod ni DPWH Director Constante Llanes Jr., unahon og trabaho ang service roads ug kinahanglan nga dunay traffic management plan ang contractor sa dili pa ipadayon ang paghimo sa underpass project sa dapit.
“Gagawin muna namin ‘yung road side na dalawa para may dadaanan kayo before we enter ‘yung gitna, ganoon ang gagawin namin doon,” pasalig ni Llanes dihang nahinabi sa mga tigbalita.
Usa sa gisugyot mao ang pagpalapad sa karsada gikan sa dan Plaridel hangtod sa Cansaga Bridge aron dunay magamit isip alternate route.
Si Llanes ang usa sa mga mamumulong sa Philippine Economic Briefing kagahapon sa Marco Polo Plaza isip maoy nirepresentar ni DPWH Secretary Mark Villar.
Siya nipasalig usab nga duna sila’y traffic management plan sa dili pa mopatuman og mga proyekto sa kadalanan kay pinaagi niini mahibaw-an ang economic viability sa karsada, ang environmental impact ug social acceptability labi na kon makamugna kini og kahuot sa dagan sa trapiko.
Si Llanes nipasabot nga dugang pagtuon ang hmuon nila karon. (SCG)