GIKLARO sa City Disaster Risk Reduction Management Council (CDRRMC) nga urban flooding ug dili flashflood ang nahitabo nga pagbaha ning dakbayan sa Cagayan de Oro niadtong adlaw'ng Lunes, Enero 16.
Gibutyag ni Virgil Lago, weather monitoring chief sa CDDRMC nga ang halapad nga pagbaha, dili flashflood susama sa nahitabo niadtong Bagyong Sendong.
Gipasabot niini nga matawag nga flashflood ang usa ka baha kung ang mga sentro nga suba, sama sa Cagayan de Oro river, ang mi-overflow na gayod gumikan sa kusog nga ulan sa Bukidnon nga bahin sa Talakag area.
Ang nahitabong pagbaha, usa ka urban flooding diin ang ulan nasinati mismo sa sentro ug giubanan pa og pagsaka sa dagat tungod kay taob hinungdan sa pressure nga halos nangbuto ang manhole miresulta sa halapad nga pagbaha sa dakbayan.
Giklaro usab ni Lago nga wala sila nagkulang og pahimangno sa katawhan sa wala pa nasinati ang pagbaha sa dakbayan.
Gibutyag ni Lago nga kanunay sila nga nagpahibalo sa kahimtang sa panahon taliwala nga trabaho kini sa Philippine Atmospheric, Geophysical and Astronomical Services Administration (Pagasa).
Kanunay usab nilang gi-monitor sa kahimtang sa kasubaan panahon adunay pag-ulan.
Gibutyag niini nga kung aduna man silay pagkulang, kini mao ang wala paghatag og abiso ngadto sa mga motorista.
Una ilang napahimangnoan nga dili moagi sa mga lugar nga bahaanan sama sa CM Recto ug Lapasan area labina na duol sa dakong unibersidad unta dili malubong sa baha ang daghang mga sakyanan.
Buot man usab nilang pahimangnoan ang mga shoppers nga dili moanha sa usa sa mga malls ning dakbayan apan dili gayod kini nila mahimo tungod kay insulto sab kini ngadto sa malls nga dili paanhaan kay gakabahaan.
Hinuon padayon sa pagpahimangno si Lago nga padayon pa ang daot nga panahon nga masinati ug magmatikod kanunay labina kung magsugod na ang pag-ulan.