NIADTONG 2012, na-diagnose ko og mild anemia sa among annual physical exam. Laliman ka, usahay tagduha ka oras na lang ang akong pagkatulog unya mosikad pa ko. Kini laging ganahan kaayo ta mobiseklita. Matug kog alas 4 sa kaadlawon, mobangon og alas 6 sa buntag aron mosikad.
Nagsige ko og research parte sa insomnia. Wa koy laing natumbok nga hinungdan, kon di ang caffeine. Moinom ko og kape kaduha sa usa ka adlaw, usa sa buntag, usa sa hapon. Gihimo nakong kausa lang moinom, apan naa gihapon. Giwagtang nako sukad niadtong sayo sa 2015, nawagtang ang akong insomnia.
Apan ang ang akong higalang doctor nipahimangno nako nga paspas ko og metabolismo base sa iyang assessment sumala usab sa among pagkukabildo. Kay insomniac ko sa una, gamay lang nga kausaban sa akong lawas, ma-trigger ni. Usa sa iyang gitumbok mao ang pagpanihapon og lawom nang gabii. Tuod, basta makakaon ko og lapas alas 9 sa gabii, maglisod na ko pagkatulog. Naay higayon nga alas 2 sa kaadlawon nagmata pa ko.
Hinuon lahi na ni itandi kaniadto nga tig-inom pa kog kape nga mahurot na lang nako ang position sa paghiga, hangtod manugtugakaok na lang ang manok.
Karon, sagad sa akong imnon mao ang ginger kun luy-a ug turmeric nga nakatabang sa akong digestive system. Sukad nga akong nadisiplina ang akong kaugalingon gikan sa pag-inom og kape, di na lisod ang akong pagkatulog. Mokape pa ko, apan sagad once a week.
Epekto
Di maayo og epekto ang caffeine sa akoa kay samtang magbiseklita ko, makabantay ko nga maora kog mangurog. Nagpasabot nga ubos kog tolerance sa kape. Nawagtang ra sab hinuon ni samtang magkadugay kog tindak. Ang nakaayo lang sa caffeine kay alerto ka. Ang nakapait kay kon wa na ang epekto sa caffeine, way kabutangan ang kakapoy.
Instead magkape ko, tubig ang akong sigeg inom. Mas maka concentrate pa ko sa trabaho.
Sa ako nang giingon, lainlain ang epekto sa kape sa matag tawo. Naay uban nakauyon samtang ang uban wala. Sa akong bahin, di makaya sa akong system ang kanunay nga caffeine tungod sa akong insomnia. Di ko pareho sa uban nga kon makainom og kape magduka, sama sa akong higala nga si ret. Chief Supt. Anthony Obenza.
Paminawa
Kon unsa may gibati sa imong lawas, paminawa. Ayaw lang pasagdi. Pila ka tuig kong nagsige og analisar sa akong insomnia, ako rang napalgan nga ang akong sigeg inom og kape ang nakaingon. Bisan buntag ko moinom, basta kada adlaw na, mobalik ang insomnia.
Karon, maminaw na ko sa akong lawas, kon unsay changes nga di maayo. Apan kon makasikad ko, tanang di maayong gipamati sa lawas, mawagtang. Lahi ra kon maka-exercise ka. Kanang exercise nga makakita ka sa maanindot nga mga talan-awon, hanggap og preskong hangin.
Mao na ang nakanindot sa biseklita.