SA wa pa ko mabuang sa biseklita, tig-inom na kog kape. Unyag mata nako sa buntag ug sa newsroom. Concentrated ang akong imnon nga kape. Sagad black ang akong imnon, way asukar ug creamer, just pure black. Naa man guy giingon nga insulto sa kape ang pagsagol og bisan unsa. Mas matagamtam sab ang kalami sa kape kon pure nga imnon.
Nagtuo ko nga ang exercise tambal sa insomnia mao nga nahibung ko nga bisan sa akong kakapoy sa sikad sa buntag ug gabii, magsiga gihapon akong mga mata. Usahay alas 4 na lang sa kaadlawon, magsawomsawom ko sa higdaan, nag-alindasay. Ako na lang madunggan ang mga tugtugaok sa mga manok sa among mga silingan.
Hangtod nga akong gikaila ang usa ka doktor nga kuyog nako og sikad. Ako siyang gisultihan sa akong insomnia nga 20 ka tuig kapin nakong giantos. Kay doktor, nangutana siya sa akong lifestyle- gikaon, giinom, trabaho ug uban pa.
Human nakog sulti, iya kong gitambagan: undang og inom og kape ug bisan unsa nga dunay caffeine, apil softdrinks; ayaw pagsikad sa gabii; kaon og sayo nga di molapas sa alas 9; tultol og katug; minosi ang kaon sa tambok ug sugar; ayaw sudli ang tiyan mga usa ka oras sa di pa matug.
Nipahimangno sab siya nako sa di paghinayhinay og bike human siya makahibawo sa akong regimen sa sikad kay ingon niya, motumaw ang daghang mga sakit.
Resulta
Human nako gituman ang iyang gisulti, nakita nako ang mga resulta sa hinayhinay. Makatug na kog sayo. Kon dayoff nako, naay higayon nga makatug ko alas 8 pa lang sa gabii. Tinuod, kon mokaon ko og alas 10 sa gabii, ala 1 na ko pasado mahinanok. Kon moinom kog kape unya di ko makasikad, ang akong blood pressure medyo taas sa naadan. Ang akong BP sagad 120/80 o 110/70. Kon magkape ko, mosaka ni sa 130/80 o 130/90.
Nawagtang sab ang akong pangurog ug pangulba ug ang akong pagka irritable. Kon magduka ko sa hapon, mga 10 minutos nga nap igo na kaayo, maulian na ko. Nakatabang usab to nako ang pagpaminos sa timbang ang tanan niyang gisulti sa akoa.
Di kay siya ra ang nagsulti nako kabahin sa caffeine, tanang mga doktor nga akong gikaestorya mitambag nga minusan o wagtangon ang akong caffeine intake.
Puli
Kining ma-addict na ka sa caffeine, lisod ning biyaan. Sama gud sa sigarilyo nga magpangita ang naanad na niini. Busa akong gihimo, nangita kog mga herbal drinks nga ikapuli. Nagsugod ko sa turmeric kun duwaw ug ginger kun luy-a. Naa may packed ana nga mga herb nga mapalit sa mga department store.
Kini gung huna-huna gamhanan kaayo. Kon unsay imong naandan, mangita ang imong utok. Aron akong ma-satisfy ang utok nako nga nagpangita, instead naay caffeine, akong giinom ang herbs nga dunay health benefit. Mao nga wa ko maglisod og maayo sa paglikay sa kape.
Mikape kog balik but ka usa sa usa ka semana ra.
Di sayon ang pagkombate sa insomnia. Apan kon di nimo ni kombatehon, daghan kini og dala nga sakit- pisikal ug psychological. Aron nimo ni mapilde, unahag disiplina ang imong kaugalingon.