NAGSUGOD ko sa pagbiseklita human ko nakapalit og mountain bike niadtong Disyembre 2009. Wa koy plano nga motungas og mga bukid kay mahadlok ko. Ako ra ganing plano mao nga sakyan nako ang biseklita sa pagduaw sa lubong ni Mary Heart.
Apan nasayop ko kay wa nako damha, nikuyog ko nilang Rembert Entece ug sa among mga silingan sa pagtungas sa bukid. Naikog kaayo ko kay padung sa Guba, upat ngadto sa lima ka higayon kong mopahuway. Niabot ang higayon dihang masikad ra nakog hinayhinay ang Guba nga way hunong. Tinuod ang gisulti ni Embet, ang Brgy. Guba, agi sa Brgy. Pulangbato, maayong praktisanan sa pagtungas og bukid. Mga 8 kilometros tuod ang sakaon, apan di kaayo hait ang tungason.
Nagtuo usab ko nga ang akong biseklita nga napalit okay ra. Apan dihang nakahibawo na ko sa lainlaing parts, nasakit kog kadiyot, nagsigeg upgrade. Niundang ko sa upgrade nga bisyo sa 2012 kay gasto kaayo kon imong paundayunan.
Hinuon, nakapalit ug naka assemble kog pipila ka mga biseklita mao nga ang akong asawa ug mga anak, kon ganahan mosikad, igo rang molimpyo ini, mokondisyon, makasikad na.
Akong na-realize nga ang biseklita maanindot nga paagi sa pag-exercise, bonding sa mga pamilya ug higala. Apan ayaw lang padala sa bisyo kay makabuslot sa bulsa.
Organisasyon
Dihang ni-shift ko sa folding bike, nagkaila mi nilang Jay Garganera ug uban pang mga mahiligon niini sama sa maestro sa Cebu Institute of Technology University nga si Dino Tabaña.
Nagsugod ra mi sa 12 ka buok hangtod nga dihang nag-regular na mi og night ride, niabot og 50. Ubos sa suporta sa Habagat, among natukod ang Tindak Bisdak Cebu Folding Bike Society, usa ka organisasyon nga nagduso sa biseklita.
Sa sinugdan, gikontrolar namo ang among Friday night ride participants. Estrikto mi sa blinkers, helmets, road formation ug uban pang mga lakang alang sa road safety. Dunay nangasilo, nagtukod og ilang grupo.
Lisod kontrolahon ang 50-200 ka riders unya pila lang ka marshals ang among ma-field. Maayo na kaayo nga makabutang mi og 12 ka buok. Nipalit pa si Jay og reflectorized vests alang sa marshals. Didto among naamguhan nga kon masobrahan ang gidaghanon, lisod ang pagkontrolar. Maka stress ang pagdala og ride kon daghan na kaayo.
Mao tingali nga gilaay si Jay, nisunod na siya namo, nag mountain biking na uban sa iyang mga classmate sa high school. Welcome to mountain biking, Jay.
Suwat
Nakadawat kog suwat parte sa pagpanakop sa mga Citom traffic enforcer sa mga taxi driver nga mo-park daplin sa dalan aron mangatulog kon lawom nang gabii ug sa kaadlawon. Matod sa letter sender, maayo nga makatulog ang mga driver kay kuyaw nga mag-drive kon magduka. Ngano man kunong dakpon?
Naa say punto ang sender. Apan giseguro usab sa Citom nga di traffic obstruction ang mga taxi. Maayo nga pangitaan og paagi sa mga transport organization ug Citom kining butanga. Pulos dunay maayong mga katarungan ang duha ka mga habig.
Dunay ginaingon nga ang pagpaminaw maoy sinugdanan sa panagsabtanay.