NING milabay'ng mga adlaw, milugwa na ang mga tawo nga buot malumpag sa kagamhanang Duterte pinaagi sa pagkombinse sa mga tawo nga wala pa kasabot sa katuyoan sa Ginoo nganong si Mayor Rody ang iyang gipili nga mamuno sa Pilipinas.
Dako ang akong pagtuo nga usa sa mga nasud nga gipangga sa Kahitas-an ang Pilipinas kay gipakita Niya nga dunay interbensiyong espituwal ang nahitabo karon ug ang Iyang napili nga maoy modala sa gitawag nga Divine intervention mao si Pangulong Rody Duterte.
Kini unta ang makita sa atong mga relihiyusong pundok labaw na niadtong nagpadala pa gihapon sa mga hunghong sa mga tawo nga nahatagan na unta og higayon nga manerbisyo sa atong nasud apan nahubog sa gahum ug bahandi.
Nakahinabi ko sa usa sa mga paryente nako nga gikan pa sa nasud sa Singapore, bakasyon lang ang iyang tuyo uban sa iyang pamilya.
Iyang gisaysay kanako ang ilang kasinatian diin bukad ang ilang atay nga miatubang sa mga Singaporean.
Usa lamang sa daghang nahinagbo nila didto nga Singaporean mao ang taxi driver nga sa dihang gipangutana sila kon mga Pinoy ba sila, sa dihang mitubag sila sa dakong, Oo, miingon ang driver nga (pinaagi sa pinulongang ingles), dako kuno kaayo ang iyang respeto karon sa mga Pinoy tungod sa atong pangulo, ug sila pa ag gihagit sa maong driver nga suportahan ang atong pangulo kay diha kuno sila nagsugod sa pag-asenso, ang sama sa estilo ni Duterte.
Kini nga mga istorya gikan sa ubang nasud nakapadasig kanatong mga Pilipino nga maghunahuna nga may paglaum pa kita nga mo-asenso sama sa Singapore, Canada ug uban pang nasud nga gikan sa pagkalugmok mibangon ug karon usa na sa gitawag nga developed country.
Kung ang ubang nasud mihagit kanato nga suportahan ang administrasyong Duterte, nganong kitang mga Pilipino dili man makahimo.
Nganong ang uban nagpunay man og saway sa estilo sa bag-ong pamunoan nga wala kahadlok.
Si Duterte nagtrabaho nga walay bagahe, buot ipasabot, wala siyay gikahadlokan nga dili na siya panggaon sa mga tawo o sekta nga dili siya suportahan.
Labaw sa tanan dili siya makapanapi kay gibangga niya ang mga sapian ilabi na sa mga ilegalista.
Kung dili si Duterte ang nahimonmg pangulo sa Pinas karon, lumpag na ang tinuod nga gobyerno ug mopatigbabaw na ang narco-politics ug kitang mga Pilipino magsalig na sa gahum sa druga.
Sama sa usa ka nasud sa Africa diin uso ang ethnic war, misalig na lamang sa kriminalidad sama sa pagpamirata sa mga barkong de karga, kawaton ang barko ug ipalukat sa tag-iya. Kini aron lamang motuyok ang ilang ekonomiya.
Kita buot ba nato nga isalig na lamang ang kaugmaon sa sunod nga henerasyon diha sa kita sa kriminalidad ilabi na ang paghagba nato sa ilegal nga druga?
Hinuktukan ta kini og maayo, bay.