MAAYONG balita alang sa bag-ong mga aplikante sa pagkuha og lisensiya sa pagmaneho og sakyanan.
Di na sila kinahanglan nga motambong og lecture, inay molargo na og kuha og pasulit subay sa bag-ong lagda sa Land Transportation Office.
Ang mga aplikante nga mahagbong sa eksaminasyon bahin sa basic driving skills theory test kun practical driving test (PDT) di mamahimong makakuha og usab sulod sa usa ka buwan base sa bag-ong gisugyot nga guidelines.
Kon mapakyas pagpasar sa PDT sa ikaduhang higayon sulod sa usa ka tuig, mamahimong maka-take og exam sa mosunod nga tuig.
Apan kon mahagbong sa ikatulong higayon, di na mamahimong maka-exam.
Gisupak usab sa mga grupo sa mga driver ang plano sa pagpakuha og exam sa mga driver nga nagkupot og professional license kon mo-renew sa ilang mga licensiya.
Si Greg Perez sa Pagkakaisa ng mga Samahan ng Tsuper at Operator Nationwide (Piston) niingon nga angay papason ang lagda sanglit makaluluoy ang mga drayber kinsa nagsalig sa ilang panginabuhian pinaagi sa pagmaneho.
Si Alex Bordadora sa Visayan United Drivers Transport Service Cooperative (Vudtrasco) niingon nga kadtong nakabaton og professional driver’s license unya mahagbong sa exam di angay i-downgrade ang ilang lisensiya sanglit di na sila makamaneho og PUJ.
Bugtong mga professional driver ang maka-drive sa mga public utility vehicle.
Si Gabriel Cruz sa Cebu Truckers Association niingon nga angay mohimo og remedial session ang LTO sama sa training ug seminar alang sa mga driver sanglit ang pagmaneho wa lang nagsubay sa libro, inay sa abilidad sa tawo.
Mao sab kini ang baruganan ni Julieto Flores, tigpamaba sa Cebu Provincial Bus Operators Association, aron dili mawagtangan og panginabuhian ang mga drayber.
Para sa mga mo-apply og student’s driver permit, kinahanglan silang moduso og birth certificate sa Philippine Statistics Authority (Psa) ug medical certificate.
Ang mamahimong maka-apply kadtong nag-edad og 17 anyos inay sa kanhi 16 anyos.
Si Flores nisupak sa gi-proposed sa LTO uban sa pagbutyag nga angay kining himuon nga 15 anyos sanglit ang mga bata karon nag-anam og kautokan.
Si Director Arnel Tancinco sa LTO-7 niingon nga ang tanang komentaryo sa mga drayber iduso sa secretariat aron maoy basehan sa ilang paghingpit sa bag-ong guidelines nga ilang ipagawas.