SA makausa pa, gipatigbabawan na usab ni third seed Stan Wawrinka ang top-seeded ug defending champion Novak Djokovic 6-7 (1), 6-4, 7-5, 6-3, aron langkaton ang titulo sa US Open kagahapon alang sa ikatulo niyang grand slam title.
Ang 31-anyos nga Swiss, kinsa mipukan usab ni Djokovic sa 2014 Australian Open ug 2015 French Open, mipakgang sa ikatulo unta nga grand slam title ni Djokovic kinsa maoy midominar sa Australia ug France.
Ang easy volley ni Wawrinka paingon sa backhand corner ni Djokovic maoy nagtapos sa dul-an upat ka oras nga panagtigi sulod sa Arthur Ashe Stadium.
“This is amazing,” matod niWawrinka atol sa trophy ceremony. “I came here without the goal to win it, but every time I step on the court I tried my best to win every match. “I think I played quite a lot of tennis these two weeks, I am completely empty. I had to bring everything I had today against Novak. It was so much emotion.”
Ang kapildihan maoy laing kasagmuyo nga naangkon sa Serbian tennis star sa Flushing Meadows diin sa ikapito niyang salmot sa U.S. Open kaduha siya makaangkon og titulo samtang kalima mahimong runner-up.