DILI na ipadayon sa duha ka mga unyon sa Korean-SPC Power Corp. ang giplanoan nga welga sugod kagahapon batok sa tagdumala nga idungan unta sa opisyal nga pagbukas sa mga tigom sa Asia Pacific Economic Cooperation sa Sugbo.
Si Dennis Derige, tigpamaba sa Workers’ Solidarity Network nga maoy nagtabang sa duha ka mga unyon sa KSPC, nga motuman sila sa kamandoan ni Labor Secretary Rosalinda Baldoz nga likayan ang paghimo og mga kalihokan nga makapasamot sa kaguliyang tali sa duha ka habig.
“Puwede man namo i-defy pero to show that we are a responsibible unionism, we will comply with the order of the secretary. Wala nay mahitabo nga strike,” pahibalo ni Derige sa gipatawag nga press conference kagahapon.
Matod niya andam na unta ang ilang mga streamer ug placard sa paglusad og welga nga giplanohan sugdan alas 2 kagahapon sa hapon.
Siya nipasidaan nga magwelga sila kon ang tagdumala sa KSPC padayon nga manlupig ug mangyatak sa mga katungod sa mga mamumuo sa maong power plant.
Kon dili sila motuman sa kamandoan ni Baldoz, ang tanang mga opisyal sa Korean-Cebu Supervisors Association ug Korean-Cebu Employees Association, ang peligro mataktak sa trabaho sanglit mahulog nga illegal ang ilang welga.
Si Derige nagpasalamat sa gihimo nga paningkamot nila ni Department of Labor and Employment (Dole) 7 Director Exequiel Sarcauga, National Conciliation and Mediation Board Director 7 Edmund Mirasol, Baldoz ug ubang mga opisyal aron masolusyonan ang mga isyu nga gipaabot sa duha ka unyon.
Apan, sila niangkon nga wa sila nalipay sa hukom ni Baldoz nga itugyan ngadto sa National Labor Relations Commission ang pagdesisyon kon balido ba o dili ang pagkataktak sa trabaho sa presidente sa KCSA nga si Lowell Sanchez.
“So mao na among greatest fear pag naa na sa NLRC. Ang pagtuo namo kining NLRC libingan ni sa mga kaso sa mga workers. Makaingon ta wa tay makuha nga hustisya diha sa NLRC,” padayag ni Derige.
Si Sanchez niingon kon mosupak sila sa mando ni Baldoz madugo ug magubot sa KSPC.
Kon mohukom ang NLRC pabor niya, ang korte momando sa tagdumala sa KSPC nga ibalik siya sa trabaho.
Ang NLRC gihatagan og 30 ka adlaw ni Baldoz pagsulbad sa kaso ni Sanchez.
Samtang nagpaabot sa desisyon niini, ang kalihim nimando nga hatagan og sweldo si Sanchez sulod sa usa ka buwan.
Si Baldoz niasumir na og hurisdiksyon sa suliran sa pamuo sa KSPC ug niluwat og lima ka pahina nga kamandoan niadtong Agusto 20 nga nagmando sa NLRC nga mao na ang mosulbad sa kaso ni Sanchez human napakyas ang NCMB paghusay sa duha ka habig.
Ang kalihim nabalaka nga maapektahan ang supply sa kuryente sa Kabisay-an kon madayon ang welga sanglit moabot sa 200 megawatts ang i-supply sa KSPC sa Visayas grid apil sa Leyte, Panay ug Negros.