MOGAHIN og tulo ka semana sa Hong Kong si world champion Marlon Tapales alang sa iyang preparasyon sa una niyang pagdepensa sa World Boxing Organization (WBO) bantamweight title karong Abril 23 didto sa Japan.
Ang pagbyahi ni Tapales sa maong nasod masilbi usab nga oportunidad nga makakuha siya og saktong ika-sparring nga si Rex Tso, ang taga Hong Kong kinsa nangandam usab sa iyang away alang sa regional title karong Marso 11.
Si Tso ug Tapales nagtambayayong na og ensayo dinhi sa Sugbo sa niaging mga semana apan nagtuo ang kampo ni Tso nga padayong pagpakig-sparring ni Tapales makatabang niyag dako batok sa Hapon nga si Hirofumi Mukai.
Si Rex “Wakee” Salud, ang manager ni Tapales, mibutyag nga tungod usab sa kakuwang og sparring mate ni Tapales dinhi sa Sugbo ang rason nganong miuyon ra usab siya nga kini adto mag ensayo sa Hong Kong.