Agpang king Bayung Tipan, ing susing pikilanlan kang YesuKristo ya pin ing ya
ing Mambang ning Dyos (Son of God ). Ini mayayakit king ulaga ning pamangaylangan
bang asanak, ikumpisal, at maniwala kaniti dikil kang Yesus karing makatuking sunis:
King Mateu | Dangka 16: Sunis 13- 17
(Matthew 16:13-17)--
“Ngeni inyang i Yeswa minta ya king dane ning Sesarya Pilippi, migmula yang mengutang karing kayang talatuki, ngana, “Ninung sasabyan da ring memalen a Mambang ning Tau?” At ngarang sinabi, “Deng aliwa sasbyan da i Yuan a Talapaminyag, at ding aliwa e Elyas,
at ding aliwa naman i Yeremyas, o metung karing talapanula. Ngana karela,
“Dapot ikayu ninu ing sasabyan yung aku? At i Simun Pedru nganang mekibat,
“Ika ing Kristu, ing Mambang ning Mabye Dyos.” at i Yeswa mekibat ya at ngana kaya,
“Nwan ka. Simun Baryona, uling ing laman at daya e na pepalto ini keka,
dapot ing Ibpa ku a ati Yu banwa.”
King Juan | Dangka 20: Sunis 30-31
(John 20:30-31)--
“Dakal karing tanda a inya sa depatan nang Yeswa king arapan ding kayang talatuki,
a e makasulat king aklat a ini; dapot deni misulat la bang maniwala kayu a i Yeswa
ya ing Kristu, ing Mambang ning Dyos; at king pamanyalpantaya yu mikabye kayu
king kayang lagyu.”
King Mumunang Aklat nang Juan | Dangka 2: Sunis 22-23
(1John 2:22:23)--
“Ninu ing malaram nung e yang maglingad a i Yeswa ya pin ing Krsitu” Iti salang king kristu, ya a maglingad na la ding Ibpa at ing Mambang. Ninu mang maglingad king Mambang
e ya kaya ing Ibpa; ninu man a papasyag ne ing Mambang kaya ya naman ing Ibpa.”
King Mumunang Aklat nang Juan | Dangka 5: Sunis 9-13
(1 John 5:9-13)--
“Nung tanggapan ta la ding saksi ring tau, ing saksi ning Dyos lakwas yang dakila;
uling ing saksi ning Dyos ya pin ini, a misapwak yang saksi dikil king Mambang Na.
Ing ninu mang maniwala king Mambang ning Dyos ati yu ing saksi king sarili na;
ninu man ing e manwla aking Dyos gewa neng malaram, uling e ya pa meniwala
king saksi ning Dyos a sipwak Na dikil king Kayang Mambang. At ing saksi ya pin ini,
a ing Dyos pigkaluban Na katamung alang-anggang bye, at ing bye ati yu king Mambang.
Ninu mang ing Mambang ati yu kaya atin yang bye; at ninu man ing ala yu kaya ing mambang ala yang bye. Deting bage a sinulat ku kekayu a maniwala king lagyu na ning Mambang ning Dyos, bang'ting upayang mika-alang-anggang bye kayu.”
Ding saksi ring Banal a Kasulatan king Mambang ning Dyos,
dapot, e migmula king Bayung Tipan – linto ya iting minuna king Lumang Tipan king kinuyad a aske ning “Mambang” (ating metung a pasubali). Kabang ing bilang ning Lumang Tipan parikil ya king Mambang (ning Dyos) e la nu man karin mayayakit anting singdakal da
ring king Bayung Tipan, bina la reting makabaldugan at asopan na la ring Kristyanu
bang akilala ya i Yesu Kristo anti ya ing tune nang Mambang ning Dyos
at nung nanu ing pakabaldugan ning Biblya kapamilatan ning salitang ini.
Ing makatuking pamipaskil metung yang pamidalan-dalan ding syam a paralan
ibat king Lumang Tipan a makimakuyad a kuru-kuru.
PIYAGPANGAN at KURU-KURU
King Kadwang akalat nang Samwel | Dangka 7: Sunis 14--
“Magi kung ibpa kaya at ya mambang ya kanaku; ampat gawa yang kamalyan,
ituntun ke kapamilatan ning mutun ding tau at ding barug da reng mambang ding tau.
Ing mumunang pamangamanu mesambitla ya king Ebreu 1:5 anting kayagpangan kang Yeswa dikil king kayang pamiigit karing angeles. Ing susni ayni misuglung ya king Dalit 89:26
anting lantaran a pamirikil kang Dabid at king pamisaring, ding mambang na.
Kapamilatan ning pamiyambing king lakwas malwalas a kalamnan ning Dalit 89:20-21;
at Isayas 55:3-4, malino a ing kabud mu tutupad king pamilarawan king pangalang-anggang kayaryan ya pin i Yeswa, ing Mambang ning Dyos, at inya sa't e makapaylalam
karing kararasanan ning pamaglabag king tipan king Dyos.
King aliwang salita, i Yeswa ya pin ing meula salang king uri
(ya pin ing Ya mapamintu yang Mambang a pandatilyan na ing “mana”)
kang Dabid at ding mambang na (ila pin ding e mamintung mambang
a kebatingan king karelang mana).
King Dalit | Dangka 2: Sunis 7
(Psalm :2-7)--
“Bitasa kung ipasyag ing utus ning Ginu: Ngana kanaku.
'Ika ing Kanakung Mambang. Ngeni beit da Ka.'
Ini mesambitla ya king Dapat 13:33 anting patungkul kang Yeswa at ing pamanyubli
nang mebye ibat karing mengamate. Ing tawling dake ning sunis ayni king Ebreu 1:5
anting patungkul kang Yeswa anting kaigitan na kaats karing angeles.
Ing tawling dake ning sunis ayni king Ebreu 5 :5 anting patungkul kang Yeswa
anting inaus na ning Dyos bang maging Matas a Pari para karing maniwala kaya.
Dakal na ing misulat dikil king Dalit 2 anting “pamamutung” a dalit para karing dai
nang Dabid king tronu na. Ali ing Dalit 2:7.12 ing anggang megamit king Biblya
anting patungkul king ninu mang mambang nang Dabid nung e i Yeswa
a metung a migit pa king taung dai nang Dabid (basan ya ing Mateu 22: 41-45).
Atin ya pa pung kasuglung ini.
***
Maligayang Pasku kekong sablang Kabalen at Kalipi king Ginu!!!
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king muirbiliuqeitpo@gmail.com mag-text o maus para karing kutang o munikala: 0942-3924-399 o 0945-3795-270.