I Yeswa at ding Manasan da reng Tau (Jesus and the Fishers of Men)

I Yeswa at ding Manasan da reng Tau
(Jesus and the Fishers of Men)

“Misan a aldo kabang makatikdo ya I Yeswa king lawa ning Gennesaret,

ding memalen lulupung lang makapalibut kaya at makirandam la karing amanu ning Dyos.

Ikit Na la king wawa ning danum tdimng adwang daung

a likwan da reng manasan a manwas karing dala ra.

Sinampa ya king metung karing daung, ing metung a bandi nang Simun

at a dayu pang bagya king pampang kaybat linukluk ya

at tirwanan na la ring tau kabang ati yu king daung,

Kaybat nang migsalita, ngana kang Simun,

“Munta ka pa king malalam a danum, at ibalag mu la ding dala ba'lang makarakap.”

Mekibat ya I Simun, “Gino,migkasakit na kaming mabilug a bengi at ala ke pa mu ring arakap.

Dapot uling sinabi mu, ibalag ku la ding dala.”

Inya gawan da na iti, menikawa lang asna karakal a bilang ding asan,

nung nu deng dala da megmula na lang malapak.

Inya migmustra la karing abe da karing aliwang daung ba'lang datang at sopan da la,

at dintang la at kinasna lang agnan deng sablang daung a sari kasna at maybug na lang lumbug.

Inyang akit nang Simun Pedru ini, siniklod ya karing intud nang Yeswa at ngana,

“Dumayu ka kanaku Ginu, makasalanan kung tau!”

Uling ya at ding abe na mengasdan la karing adakap damng asan a kingwa da,

anti mu rin kari Santyagu at Wan, a mambang nang Sebedi, kabakas nang Simun.

Kaybat I Yeswa ngana kang Simun,

“E ka tatakut; magmula mgeni magi na kang mandakap karing tau,”

Inya pin kilyut da la ding daung da king pampang, likwan da ing sabla at telukyan da Ya.”

~ Lukas|Dangka 1: Sunis 1-11

(Luke 1: 1-11)

"Kaybat pepakit yang pasibayu karing talatuki I Yeswa king laut ning Galilea.

Antini ing milayri: I Simun Pedru at Tomas (mekilala mu naman anting Didimus),

I Natanyel ibat king Cana king Galilea, ding mambang nang Sebedi,

at adwang aliwa pang talatuki abe-abe la.

“Lumwal kung manasan, “ nganang Simun Pedru karela.

“Tuki ke keka.” Inya linwal la at miras keng daung, dapot king benging ita ala lang ikwa.

Abak a maranun, I Yeswa tinikdo ya keng bebe, dapot ding talatuki e da abalung ya pin I Yeswa.

Inaus na la, “Kakaluguran, e kayu pa menasan?” “Ali,”pekibat da.

Ngana, “Ibalugse ye ing dala keng gilid ning daung at manakit kayung mapilan.”

Inya gewa da, e de agyung isaka ing dala uli ding dakal a bilang ding asan.

Kaybat ding talatuki a liguran nang Yeswa ngara kang Pedru, “Ya pin ing Ginu!”

Kabud dindam nang sinabing, “Ya ing Ginu.”

belabal ne ing panglwal nang imalan kaya (uling likas ne) at linugsu ya king danum.

Ding aliwang talatuki tikyan de ing daung, tataguyud de ing dalang kisnang asan,

uling e la marayu king bebe, manga pilang kayagpa.

Inyang kasaka da, ikit da ing aping mandapug uling karin a ating asan,

at mapilang tinape.

Nganang Yeswa karela, “Dalan yu la ding mapilang asan a adakap yu pa,”

Inya I Simun Pedru sinampa ya king daung at teguyud ne ing ing dala papunta keng bebe.

Kasna ya iting mangaragul a asan, 153, dapot agyang marakal la ing dala megabak la.

Nganang Yeswa karela, “Ume kayu at mangan abakan.”

Metung man kareng talatuki alang kinutang Kaya, “Ninu ika?”

Balu dang ya pin ing Ginu. Dintang ya I Yeswa, pirasu ne ing tinape

at binye karela, at antita mu naman kareng asan.

Ya pin ini ing katlung ukdu a pepakit ya I Yeswa karing talatuki na

kaybat nang tinikdo karing mengamate.

Kaybat dang mengan, nganang Yeswa kang Pedru,

“Simon mambang nang Wan, kaluguran mu ku migit pa karene?

“Wa, Ginu,” ngana, “balu mung kaluguran da ka.”

Nganang Yeswa, “Pakanan mo reng tupa ku.”

Pasibayu nganang sinabing Yeswa, “Simon mambang nang Wan, kaluguran mu ko?”

“Wa, Ginu,” ngana, “balung mung kaluguran da ka.”

Nganang Yeswa, “Ingatan mo reng tupa ku.

King katlung ukdu ngana kaya, “Simon mambang nang Wan, kaluguran mu ko?”

Menasakit ya I Pedru uling kitnan neng makatatlu, “Kaluguran mu ko?”

Nganang sinabi, “Ginu balu mu ngan ing sabla; balu mung kaluguran da ka,

nganang Yeswa, “Pakanan mo reng tupa ku. Tutwanan sasabyan ku keka,

inyang lakwas ka pang anak piblasan mu ing sarili mu at minta nung nu mu buri.:

dapot inyang matwa na ka inagpa mo reng gamat mu,

at ating mamiblas keka at ituki na ka nung nu ka e bisang munta.”

I Yeswa sinabi na ini bang ipabalu ing uri ning kamatayan

nung nu na ya paligayan ing Dyos.

Kaybat ngana, “Tuki ka kanaku!”

~ Wan | Dangka 21: Sunis 1-19

(John 21:1-19)

***

Bukas, Aldo ring Palaspas o Domingo de Ramos, magmula na ing awsan tamung Maleldo o ing pamiganaka king delanan nang dusa't kasakitan ning Ginung YesuKristo. Ganakan bukas ing pamaglub na king Templu ning Yerusalem a nung nu maganap ing pamanaral nang tegunan da reng Udyus a Pariseu at aliwa pa a maging dalan bang misangkanan Yang kakalaban keng kapamalan da reng Udyus.

Deng mumunang sunis lalarawan da ing pamamili na ning Ginung YesuKristo karing mumunang talatuki na a atagmwan na keng Galileo. E la matas a pegaralan nung e pakakalulu la mung mangwang asan.

Makalarawan iti karing mumunang sunis ibat karing aral da ri Lukas at Wan—ing pamanubud na kareng talatuki nang manasan a magmula king aldo ayta magi na lang manasan a dakap karing tau.

***

Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king muirbiliuqeitpo@gmail.com mag-text o maus para karing kutang o munikala: 0942-3924-399 o 0945-3795-270.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph