“Ngeni ing amanu ning Ginu dintang kang Yonas a mambang nang Amittai, sasabing,
“Ume kang tambing king Ninebe, ing dakilang lungsud; at gulisak laban kaniti;
uling ing karokan damiras kanakung bigla.”
Dapot I Yonas migadya yang dumayu king Tarsis marayu king arapan ning Ginu.
Kinuldas ya king Dyoppa at ikit ne ing metung a panglayag papunta Tarsis;
inya beyaran na ing pamasai at sinake ya, bang munta agnan da king Tarsis,
marayu king arapan ning Ginu.
Dapot ing Ginu besibas ne ing masikan a angin king dagat, at ing antitang masikan a bagyu
miras ya king dagat a memalang masira ya ing daung.
Kanita ding maglayag mitakutan la, at balang metung ginulasyo king dyos da.
Belugse da ing dala dang ati king daung king dagat bang kumayan la.
I Yonas naman, kinuldas ya king talanan ning daung at migkera ya, at mipatutud.
Ing pekapun ning daung dintang ya at ngana kaya, “Nanu ing gagawan mung pamanudtud?
Mibangun ka, awsan me ing dyos mu! Mekad ing dyos dinan na katamung pamisip
bang e tamu mangamate.”
Ding maglayag ngara king balang metung; “Ume kayu at magdais tamu abang abalu tamu
nung kaninu sangkan ining sigwang dintang kekatamu. Inya sa't migdais la,
at ing dais mebaldug ya kang Yonas.
Kanita ngara kaya, “Sabyan mu kekami o't ing sigwang ayni dintang ya kekatamu.
Nanu ing kapanintunan mu? Nu ka ibat”
“Udyus ku.” nganang mekibat. “Sasamban ke ing Ginu, ing Dyos ning banwa,
a miglalang king dagat at mamala.”
Kanita ding lalakio lakwas lang tinakut, at nagra kaya, “Nanu ining depatan mu!”
Uling deng lalaki balu dang ya tatakas ya king arapan ning Ginu, uling sinabi na iti karela.”
Kanita ngara kaya, “Nanu ing gawan mi keka, bang ing dagat manaimik ya para kekatamu?”
Uling ing dagat lakwas yang babagsik.
Ngana karela, “Kunan yu ku at iyugse king dagat; kanita ing dagat manaimik ya para kekayu;
uling balu ku a pauli ku a ing masikan a bagyung ini dintang ya kekayu.”
Makanyan man deng lalaki pekabagse da bang ibalik ya ing daung king mamala.dapot e da agyu,
uling ing dagat megi yang lakwas mabagsik.
Kanita ginulyo la king Ginu, “Pakisabing mayap O Ginu, manalangin kami,
e Mu pabustan ing mangamate kami pauli ning bye ning lalaking ini.
E mu ke paburen mikasala king dayang alang male: para keka,
O Ginu, uling depatan mu iti para king ikatula Mu.
Inya seliklut de I Yonas at inugse de king dagat; at ing dagat tinuknang yang mimwa.
At kanita ding lalaki pitakutan de ing Ginung lalu, at myampang lang daun king Ginu at tinipan.
Dapot ing Ginu memye yang maragul a asan bang iyakmul ne I Yonas;
at I Yonas ati yu king atsan ning asan kilub ning atlung aldo at atlung bengi.
Dalit ning Pamipasalamat
Kanita I Yonas mengadi ya king Ginu ing Dyos na ibat king atsan ning asan,
Ngana, “Minaus ku king Ginu pauli ning dusa ku.
At pekibatan Na ku; kilub ning atsan ning Syeol ginaga ku, at dindam mu ing siwala ku.
Belugse Mu ku king malalam, palub king pusu ding dagat, at ing albug pelibutnan na ku;
ding sablang alun mu at pamanalun lebasnan da ku.
At ngakung sinabi, 'Mipapaanyud kung parayu king panakit;
makananu kung lumawe pasibayu king nwan mung pisamban?”
Ding danum linapit la kanaku;
ing kalalaman peligiran na ku;
ding dikut mibalut la king buntuk ku
at ding yamut ding bunduk,
kinuldas ku king mamala a nung nu ring sumbagal
sinukul da kung alang-angga.
Dapot inangat Mu ing bye ku king Aun.
O Ginu, kanakung Dyos.
Kabang ing bye ku lilipas ya,
Aganaka ke ing Ginu
at ing dalangin ku miras keka,
king banal mung pisamban.
Deng sasamba karing alang kabaldugang aske
pabustan da ing tune dang katapatan.
Dapot aku kapamilatan ning siwala ning pamipasalamat
midaun ku keka; at ing tinipan ku kanakung bayaran.
Ing pangakabus king Ginu ya.
Kanita ing Ginu pekisabyan ne ing asan, at inapsa ne I Yonas king mamala.”
~ Meyangu king Aklat nang Yonas | Dangka 1: Sunis 1-6
***
DIPARAN, KASEBYAN at KABALDUGAN
Maralas dang sasabyan da reng kabalen ing antini:
“Maglimid ya neng kapitangan bengi.” E ya pangkaraniwan ing amanung “limid”. Iti metung ya kareng mapilan a malagad mung magagamit a amanu.
Kabaldugan: Mamangan pasalikut. Panako lulusub keng simpanan pamangan, kusina, lasne o ref bang mangan kabang alang manakit.
***
MIKANLAPIT at MISUGLUNG KABALDUGANG AMANU
bangalan – gawang adwa o dakal a dake o pirasu ing metung a bage.
bisaklatan – anti keng “bangalan”, gawang adwa o dakal a dake o pirasu ing metung a bage.
sagsagan – anti keng “bangalan” at “bisaklatan”, gawang adwa ing metung a bage.
pitnan – anti keng “bangalan” at “bisaklatan” at “sagsagan”, gawang adwa ing metung a bage.
piraswan – gawang adwa o dakal a dake ing metung a bage.
pututan – ikuyad ing metung a bage kapamilatan ning mataram a kasangkapan.
gilyan – sagsagan ing metung a bage kapamilatan ning mataram a kasangkapan.
pikawani – miyayabe a idayu keng siping o lele ning balang metung.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king muirbiliuqeitpo@gmail.com mag-text o maus para karing kutang o munikala: 0942-3924-399 o 0945-3795-270.