“King aklat a my “Lawen me ing Indu mu: Metung a pamimingwa king Maka-Biblya at Maka-Amlat a pamamingwa karing turu dikil kang Marya ating walung sangkan para king kapanwalan king Dalise Pamikagli:
1. I Marya mibulalag a “kisna yang kalam”.king Lukas 1:28.
2. I Mary mibulalag a ya ing pamitupad king ula a “Kambang ning Siyon” nang Isayas 12:1-6; Sepanaya 3:14-16: Sakaryas 2:10, at dakal pang aliwa.
3. I Mary mibulalag a ya ing ning “kamumulan bayung pamaglalang” anting pamipatupad king ula nang Yeremyas 31:22.
4. I Mary mibulalag yang ating “nwan a kabilyan” kapante nang Kristo king Lukas 1:42.
5. Meyaus ya i Marya e mu anting “nwan” karing sablang babai, dnung e “lakwas nwan karing sablang babai” agyang kang Eba king Lukas 1:42.
6. Mibulalag a i Marya a “alang dusing” a”Arku ning Pamisamak” king Luke 1.
7. Mibulalag a i Marya ing “Bayung Eba” king Lukas 1:37-38; Wan 2:4, 19:26-27; Pamibulalag 12; at aliwa pang dane.
8. Mibulalag a i Marya ligtas ya king kasakitan ning pamanganak anting pamipatupad king Isayas 66:7-8.
1.Lukas 1:28
At ing angel a Gabriel dintang ya kang Marya at ngana, “:Bapu Marya, mipmu king kalam, ing Ginu ati yu keka!” Dapot bina yang miganaka king mesambitla, at tinuring na king isip na ing uri ning pamanatu iti. At ing angel ngana kaya, “E ka tatakut, Marya, uling mika-kaganakan kang manibat king Dyos.
Makasulat king Romanu 3:23, “Ding sabla mikasala la ngan at misaldak kulang king ligaya ning Dyos.” Dagdag pa king mumunang aklat nang Wan 1:8, “Nung ninu mang tau ing sasabi a e ya pa mikasala malaram ya at ing ing katutwan ala kaya.”Deting sunis a deti sukat lang malaging malino karing kata-katang Protestanti: “Makananung ing ninuman makapanwala a i Marya dalise ya king sala ding amanung menibat karing Banal a Kasulatan? Nanu pa, nganang mismung Marya, ‘Ing kaladwa ku matula ya king Dyos a kanakung Talapangabus' king Lukas 1:47. Malino nang asanak a ing sarili na makasalanan ya nung kaylangan ne ing talapangabus.
Ing Ula king Minunang Panaun: Kapaglalangan 3:15
Ing Kapaglalangn 3:15 maralas yang abanaggit ding talapagaral ning Biblya anting Protoevangelium o Mumunang Mayap a Balita. Aral ya bayu pa man “ing aral.” Ining ditak a sunis atin yang ditak a ditak a binang amanu dikil king pamalak ning Dyos king Pamikabus, a mibulalag at mipaltutu king pangatau nang YesuKristo, Makanyan man neng babasan ne ning ninu man ing sunis, ing ninu man e na malyaring e apansing a ing ing makaulang babai bala mu atin yang malyaring abansagan a makaligalig a kabantugan at kaulagan king pamalak a pagkalub ning Dyos:
Mibili king pamisalang libutad mu at ning babai, at libutad ning bini mu at ning bini na: galusan ne ing buntuk mu at galusan me ing sakung na.
E mu atin tamung Pamibait ning Dalaga a makapasyag keni uling ing sunis sasabyan na a ing Mituburan o Messiah mibait ya king “bini ning babai” (mangabaldugan yang lalaki) dapot pansingan a “ing babai” e ya makayabe anting “bini ning dimonyus”. (Ing “bini” ken yang lalaki),
Balamu ing babai at ing kayang bini makasalang la at inya sa e la makapaylalam king sakup ning dimonyus at ing “kayang bini”—ya pin ing ding sablang ating pigmulang kasalanan at “likas lang anak ning kamwa anti king sinulat nang Pablu king Episyanu 2:3. Keni atin tamung king aske ning bini ing katutwan a ing babai—i Marya—magi yang dalise alang kasalanan, lakwas na ing pigmulang kasalanan, nung makananung ing mambang na—ing Tubud a Talapangabus—makanyan ya mu naman. Makatimid bina a i Marya tune kapansing-pansing a king payntungul ing Tubud a Talapangabus masasambitla ya mu makasuglung kaya. Ditak mu ing pamikakunu ing pamiyambing a makagulis libutad nang Yeswa at Marya at ing lubusan dang pamisalang king dimonyus.
3. I Mary, Daung ning Tipan
Ing Lumang Tipan king Daung ning Tipan tutwanan yang tanda ning kanwanan. Larawan ya iti ning kadalisayan a kakaylangana ning Dyis para karing bage at taung malapit makayagum Kaya at king pamalak ning pamikabus. Uling midatuk kaniti ing pamanarap ning Dyos a dirinan nang tanda ding atlung uri ning panyatang ning Talapangabus—ding manna, ding Apulung Utus, ing tukud nang Aaron—kaylangan lang maging dalise at e mitagkilan king makasalanang tau.
King Bayung Kasulatan, ing bayu at tune daung e ya bage e gagalo, dapot metung yang dalise bage: Ing Nwan a Indu. Nung makananu kadalise ya pin ing tune daung neng sasalang-alang tamu a ing lumang daung metung ya mung “alino “ agpang kaniti.
Ing larawan nang Marya anting Daung ning Tipan metung yang tanda a i Marya makabage yang dalise, alang nanu mang pangayawa king kasalanan bangting upayang magi yang karapat-dapat maging datukanan ning Dyos king atsan na. At pekamaulaga , nung makananung ing daung ning Lumang Tipan malinis yang bina magmula king penandit a megawa ya a ating malino a banal king Pamilikas 25, inya i Marya mu naman pekadalise ya magmula king penandit ning kayang pangakagli. Ing Dyos, kanita, kapamilatan ning Dalise Pamikagli, inadya na ing santungan agnan karing Luma at Bayung Tipan.
***
Masayang Aldobeytan karing wali ku—Jose B. Garcia, Jr. o makibat king palayo “Nono” ngeni at bukas naman king wali kung i Concepcion “Comben” G. Mendoza. Pagkamalan na kayu sana ning Apung Ginu parati at kabang bye.
***
DIPARAN at KASEBYAN
Maralas dang sasabyan da reng kabalen ing antini:
“Banal a asu, banal a kabayu!” Sasabyan da la ring amanung deti karing mapagkumwaring tau a ila kanu banal la at ala lang kasalanan inya miras la banwa.
Kabaldugan: Taung magmayap-mayapan o magbanal-banalan.
***
MIKANLAPIT at MISUGLUNG KABALDUGANG AMANU
1.banal – alang kasalanan o mipatawaran na king sala
2.nwan – mipagkalubang kalam
3.santu – Kastilang amanu katumbas ning “banal a lalaki”.
4.santa – Kastilang amanu katumbas ning “banal a babai”.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king muirbiliuqeitpo@gmail.com mag-text o maus para karing kutang o munikala: 0942-3924-399 o 0905-2162-419 o keng Facetime: 0999-3654-490.