Nanu ing Panyatang?
Ing Panyatang apat yang Duminggung kapanaunan makatagulaling king pamibule-bule pamiadya king pamanyatang ning, “panyatang”, ning pangabait nang YesuKristo. At ning Kapaskwan mu naman at ing asaang pamibalik nang Kristo king Kadwang Panyatang. King maulagang kapalyaryang deni king kalendaryu ning pisamban, balang paruminggu makatingid ya king aliwang paksa – pagasa, kapayapan, tula at lugud. Ding Kristyanu karing aliwang aguman at pigmulan pagmasusyan na ing Panyatang karing miyayaliwang paralan dapot deti makatingid la ngan king pamanantabe king pamanenaya king panyatang nang Yeswa.
Deni ring mapilan a sikat a sunis king Biblya a parating magagamit king kapanaunan ning Panyatang:
Mumunang Paruminggu ning Panyatang: : Pag-asa – Isayas | Dangka 9: Sunis 2-6
"Ding taung lalakad king dalumdum menakit na lang dakilang sala; karetang mabibye king labwad ning malalam a dalumduming sala sinlag ne. Peparagul me ing balayan at digdgan ing tula da; matula la areapan mu anting taung matula neng papalut, anti karing magkipaglalumpungan kabang pipipitnan da la ding asamsam. Uling, mengari king aldo ning pangasambut ning Midyan, abalbal mu na ing darala dang bayat a magpalasa karela, ing tigkal a pupusanan da, ing taiktik ning karelang pamaglasa. Balang sapinbitis ding makipaglumpungan a gagamitan da king lumpungan at susulud a mibabad king daya makatalagang masilab, maging panangab para king dapug. Uling para kekami misapwak ya ing pungul, kekami mipagkalub ya ing mambang, at ing kapamalan pusanan ding pago na. At mibansgan yang Makasdang Talausuk, Mayupayang Dyos, Alang-anggang Rajah ning Kapayapan.”
Kadwang Paruminggu ning Panyatang : Kapayapan : Isayas | Dangka 40: Sunis 3-5
"Ing siwalang mamaus: “King ilang miyadya kayung dalang para king Panginwan; itulid king ilang ing matas a dalan para king Dyos tamu. Balang libis miyangat, balang bunduk at burul mibaba; ing magaralgal a dalan mapatag, ding mabikwal a dane anting kapatagan. At ing ligaya ning Panginwan mipasyag, at ding tau akit dang agnan-agnan. Uking ing asbuk ning Ginu migsalita na Ya.”
Katlung Paruminggu ning Panyatang Tula : Isayas | Dangka 12: Sunis 2-6
"Bitasa ing Dyos yang pangakabus ku; Manalig ku Kaya at e tumakut. Ing Panginwan, ing Dyos mismu, ing kanakung sikanan at kapaminwan; megi yang kanakung pangakabus. “King tula mu magut kang danum karing talaga ning pangakabus. King aldo ita sabyan mu: “Mamye kang papuri king Ginu, ipasyag ing Kayang Lagyu; ipabalu kairng bangsa nung nanu ing depatan Na, uling dinapat yang dakal a maligayang bage; ipabalu la reti king mabilug a yatu. Gulisak masikan at magdalit para king tula, memalen ning Zion, uling dakila ya ing Nwan a Metungning Israel libutad yu.”
Kadwang Paruminggu ning Panyatang : Lugud. – Lukas | Dangka 1: Sunis 46-45
Ing Kaladwa Ku: Papuring Dalit nang Marya:"At nganang Marya: “Ing kaladwa ku paligayan ne ing Gini at ing diwa ku matula ya king Dyos a Talapangabus ku. Uling megi yang maisip king pakumbabang kabilyan ning talasuyu Na. Magmula ngeni ding sablang dai awsan da kung nwan uling Ing Metung a mayupaya dinapat yang dakal a dakilang bage para kanaku—ing banal ya ing lagyu na ing pakalulu Na miraras karing tatakut kaya, dai king dai ginawa yang mayupayang dapat kapamilatan ding gamat na; silbag na la deng mapagmaragul karing pekakilubkiluban a pamisip da migpabagsak ya karing manimunu karing tronu da dapot inangat na la ding mapakumbaba ppeakabsyan na la ding danupan kairng mangayap a bage dapot tebi na la ding mabanding alang laman sinopan ne ing talasuyu na king Israel, genaka nang maging mapamakalulu kang Abra'am at ding tinuking dai nang alang-angga; nung makananu nang pengaku iti karing pipumpunan.”
***
Maligayang Kayaldawan ning Kristong Ari napun, pagmasusyan da ring kaparang Katoliku karing balang parokya mabilug a bangsa. Lwid ya I YesuKristo! Hallelujah!
Masayang Kayaldawan king pisan kung pangane pisan-- Conrado (Ding) G. Pacia, ning Sta. Cruz, Macabebe; at kang Jolina Manansala, ning Nigui, Masantol (Madonna ning Mawli) napun mu naman—Disyemrbi 3, banwang kasalungsungan.
Pagkaluban na kayu sanang kalam ning Ibpang Kakataskatasan parati at kabang bye.
***
Dake Talabaldugan:
1.nayun – sentingan, legwan, makasining. English: being pleasant to the eyes or senses. Alimbawa king pamangamit: “Alang kasing nayun ing akakit lang mikasundu deng mikakapatad agyang makananu la pa kakalulwan.”
***
DIPARAN at KASEBYAN
Maralas dang sasabyan da reng kabalen ing antini:
“Masikan ya datang!” Sasabyan da reng bayung dai o kayanakan ini kareng masikan a pangatau o masikan maka-gayumang tau—babai man o lalaki agyang e la binang malagu o masanting.
Kabaldugan: Mapanyamsam pansing pauli ning kakaengganyung pangatau da pauli ning bikas o legwan, kimut, pamangsalita o pangatau.
***
MIKANLAPIT at MISUGLUNG KABALDUGANG AMANU
1.pamagbalik – pamamunta king penibatan
2.pamaglako – pamaglakad o pamaglakbe parayu
3.pamaglayas – bigla o pasalikut a pamaglako king pibatan
4.pamagdayu – pamaglaut king penibatan
5.pamanakas – pamaglako pasalikut
6.pamanyubli – pamibalik king nanu mang ikwa, kinwa o tinggap
7.pamagpusitara – anti king pamanakas, pamaglako pasalikut
8.pamanuli – pamibalik king pibale-bale, tuknangan, balen o bangsa o nanu mn o ninu mang likwan sadya
9.pamibalik – aliwang aske ning pamagbalik
10.pamun – pabalu o kapabalwan king pamaglako
11.panyatang – pamamunta king dane a mekad e pa apuntalan o babalikan pasibayu
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king muirbiliuqeitpo@gmail.com mag-text o maus para karing kutang o munikala: 0942-3924-399 o 0905-2162-419 o keng Facetime: 0999-3654-490.