Inya kanita, king kapibabatan, mulandit tamu naman king pamisiglulu
a milatag king arap tamu,uling atin tamung asna kadakilang biga
ding saksi a makapalibut kekatamu. Ibalugse ta la ding labis a daralan,
iyugse la ring salang misasakab kekatamu.
Ding Ebreu|Dangka 12:Sunis 1 (Hebrews 12:1)
O anak nang Prita, ing kalawsang lub ayta e masisira,
a palambatan ning katatagan pauli ning pamisanmetung king Ginu,
at inya sat ampatan no ring isip, bye, at kimut ding panamdam,
ati king paralan ning kayapan.
At itang kalawsan-lub nung nu ing ninuman kakalawat ya
king mabungang kapalyarayan king kapanyamban,
pamisulung kabyayan at kakebsyan ding kapanandaman
ati yu king kalikasan ning lusuk panamdam, O Ardyun.
At itang kalawsan-lub a e lalagpus king pamaninap, pangamatakut,
pamanyambitan, kapagmaulunan, at kamalyan belwan
ing e byasang kalawsan-lub iti ati yu king paralan ning dalumdum.
O pekamayap karing Barat, ngeni pakirandaman mu sana Kanaku
ing dikil karing atlung ligaya a katulan ning misane kaladwa,
at kapamilatan da dusuldit daratang ya king wakas ding sablang lugma.
Itang king mula mengaring lasun dapot king dake tawli mengaring sabo mayumu
at yang gigising king ninuman king pamangilala king sarili masasabing ligayang ati king paralan ning kayapan.
Dalit ning Kakatskatasang Panginwan|Dangka 18, Sunis 33-37 (The Song Of God 18:33-37)
Balita king kasalungsungan ing pangaras at pamangdugpa ning “Perseverance†a peganan da mu keng computer technology deng Amerikanu bang manaluse king Mars. Masanting ya kabaldugan nung iyambing ya king panugali ning tau.
Kelawsan lub. dapat laus ka lub ba-kang magtagumpe king nanu mang bage o bang dasnan mu ing tagimpan mu. Nung ala ka kaniti patsamba-tsamba ka mu. Bala tutumbuk ka king bulan o Mars! Maulaga yang sangkap ning tagumpe ing laus ya lub ing ninu man.
Alimbawa king pamaglolo nung ing baintau talaga neng buri ing metung a dalaga dapat e ya patugut susuyu kaya, papakit parati o e papakit nung e dapat. Dapat pakibalwan na ing buri at e na buri ning paglolwan na. Itang buri na yang daptan na at itang e na buri e na sukat daraptan akakit na man o ali ning pakamalan na uling sangkap ning kelawsan lub ing katapatan lub o kadalisen ning kapagnasan.
Nung magaral tamu, kaylangan ing kapibabatan, kasipagan, pamagtyaga, at katapatan king kapagansan a mabyasa agyang alang magbante kekatamu. Mayap a kebyasnan ing parasan ning pamagaral at ita ing sukat ati king kektamung isip, pusu at pangatau.
King parasan antita mu naman. Nung bisa kang magtagumpe king kekang piniling kapanintunan dapat pakasamasnan mung gawan ing sablang makasaup bang agawa mung masalese at king pekamayap-diling paralan a makisangkap kelawsan lub ing sablang gawa mu at kaylangan ing tapat ka kaniti. Bala maglolo ka naman neng manintunan ka at deng paralan ala lang pamiyaliwa.
King kasalpantayanan at pamanyuyu king Apung Ginu antita mu naman ing paralan. Kaylangan ing kelwsan lub, tyaga, pamanyulung at e pamanurung agyang nanung malyari at agyang nanu man ing makasalabat king daralanan. Agyang asna pa kasakit at bala sapalang dasnan e ta sukat paysira lub at tutuknang bang dasan ing tagumpe tagumpe king pamagbalik king karinan ning Kakataskatasang Ibpa.
Nung makananu ing pamaglolo, pamagaral at pamanintunan antita mu naman kaylangan at sukat tamung maging laus lub a magtagumpe bang miras at makapagbalik king banayad dapot matigik a kaul ning Apung Ginu pauli ning alang-anggang lugud na kekatamu.
Dake Talabaldugan:
1. melsinta (pangdiwa) milsinta, pekamal, linugud, miglolo, mekaburi. English - fallen in love, infatuated, smitten, fell head over heels, bewitched, enchanted, enthralled, enticed, cared for, adored, soted on, had a soft spot for, fell for, adored. Alimbawa king pamangamit: Agyang dakal ne kanu akapaglolo i Metsang angga man ngeni e ya pa kanu melsinta kaninu mang akapaglolo na manibat king ibat.
2. mekad (panguri) mapalyari, siguru, marail. English - maybe, perhaps, perchance, haply, presumably, possibly, probably, it could be that, it ma be that; rumor has it, I dare say. Alimbawa king pamangamit: Mekad tawli tamung diling midinan panulu keng panglaganas a sakit uling ating kupa-kupad magpasya kareng sukat magpasya.
3. meko (pangdiwa) mebating, miglakwan king penibatan o sadyang tuknangan o kabilyan. English - left, departed, gone, quit, gave up, withdraw, retired, disappeared, went away, went off, tokk one’s leave, took oneself off, deviate, digress, diverge, swerve, veerstray, expire, retreat, secede. Alimbawa king pamangamit: Mekad tawli tamung diling midinan panulu keng panglaganas a sakit uling ating kupa-kupad magpasya kareng sukat magpasya.
4. Menila (palagyu) Ing lungsud panglibutad a pikilanlan king Pilipinas; sadyang Maynilad o ating nilad. English - Manila, capital of the Philippines. Alimbawa king pamangamit: Manibat inyang milabas a banwa, e na ku mekaluslus Menila inya ala kung gamit a panggulis nung e na mu ing mitagan a sadya.
5. menikal (panguri) mepagal, sinawa, mesuya, e na bisa, merindi, sinuku, minurung. English - sickened, became bored, exhausted, felt fatigued of, grew weary, ran out of steam, stressed out, sick and tired, fed up, worn-out, worn down. Alimbawa king pamangamit: E ne bisang makikit keng asawa na i Metsang uling menikal ne kanu pilibluban kaya kaybat ning apulung banwang pibabatan ne karokan ugali.
SADYANG GAWI DA RENG KAPAMPANGAN
Kanita gawi da reng kabalen ing magpabandying-bandying kareng lalam tanaman. Misasabit la mung duyan a gawa keng yantuk at karin la mu yuyuyuyu neng makasalilung la keng alino ding tanaman a dakal bulung. Maralas deng aliwa ken lang lalam kwayan o lalam, byabas, mangga o aliwa pang impun a malabung bulung. Ating karen lang lalam bangkal inya mabanglu ing angin manibatan kareti.
Ngeni lakwas na king panaung kasalungsungan mekalingwan na ing makanyan a gawi.
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek-ong talasulat king garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.