“Ding Aklat ding Dalit anti ning atin tamu ngeni bunga ning paralan
a milyari king kekaban ning libung banwa.
Migmula king tunggal-tunggal a dalit, a ing Dalit ka-90 nang Moses
yang pekamumuna (kilub ning 1400 Bayu kang Kristu).
Migit kapitna kareti sinulat nang David (kilub ning 1000 Bayu kang Kristu).
Kaybat ding tunggal-tunggal a dalit misimpan la anting katipunan ding aklat
a pangmaldang pamanyamba, katatawlyan mesalese la lub ning katatawlyang aklat,
mekad manga 444 Bayu i Kristu (Panaun nang Ezra).
I David misulat yang manga 73 dalit. Adwang liping Leviticus misulat lang 22 dalit.
I Asaph (at ding sapni na, 12 dalit; ding mambang nang Korah, 10 dalit).
I Solomon misulat yang adwang dalit. I Ethan a Ezhranite misulat yang metung.
I Moses metung. Ding aliwang 51 dalit alang makabitasa nung ninung mikudta.”
Ding makatuki mapilan la karing makasulat king Aklat ding Dalit:
1.Dalit 5:11
Dapot bustan lang tumula reng bibili da ing kapanaligan da Keka:
Bustan lang gulisak para king ligaya uling paglwalu Mu la:
bustan lang ding lulugud king Lagyu Mu ligaya la keka.
2.Dalit 7:17
Puryan ke ing Ginu agpang king katalarwan Na:
at magdalit kung kapuryan king Lagyu ning Ginung kakataskatasan.
3.Dalit 8:1
O Ginung kekaming Dyos, asne kapantas ing Kekang Lagyu king mabilug a yatu!
A migbili king ligaya mu babo ding banwa.
4.Dalit 9:10
Magi kung matula at tumula Keka:
Magdalit kung kapuryan king Lagyu Mu, O Kakatasakatasan.
5.Dalit 9:10
At ilang balu da ing Lagyu Mu ibili da ing tiwala da Keka:
uling Ika, Ginu, e mo pepaymburisan ding magdulap Keka.
6.Dalit 18:49
Inya sa pasalamat ku Keka, O Ginu, king lupung ding alang Dyos.
At magdalit kapuryan king Kekang Lagyu.
7.Dalit 20:1
Ing Ginu dandaman Na ka king panaun ning sigalut;
ipanglwalu Na ka ning Lagyu ning Ginu.
8.Dalit 20:5
Tumula kami king pangakabus yu,
at king Lagyu ning Ginu italakad mi la ding watawat mi.
9.Dalit 20:7
Ding mapilan manalig la karing kareta, at ding aliwa karing kabayu:
dapot ganakan mi Ya ing Lagyu ning Ginung kekaming Dyos.
10.Dalit 22:22
Ipasyag ke ing Lagyu Mu karing kanakung kapatad:
king libutad ding malda puryan da Ka.
11.Dalit 23:3
Penyubli ne ing diwa ku: tiki na ku karing gasgas ning katalarwan
para king kayapan ning Lagyu na.
12.Dalit 25:11
Para king kayapan ning Lagu Mu, O Ginu, patawaran mo ring sala ku uling dakal la.
13.Dalit 29:2
Ipagkalub ing ligayang karampatan king Lagyu Na;
samban Ya ing Ginu king legwan ning kabanalan.
14.Dalit 31:3
Uling ika ing batu ku at kanakung dalig;
inya pin sa’t antabayanan Mu ku, at turwanan.
15.Dalit 33:21
Uling ding pusu mi tumula la Kaya,
uling menalig na kami king kayang Nwan a Lagyu.
16.Dalit 34:3
O ipakit mu ing degulan ning Ginu kapamilatan ku, at iyangat ta Ya ing Lagyu na itamu ngan.
17.Dalit 45:17
Ipaganaka ke ing Lagyu mu karing sablang dai:
bang’ting upayang ding tau puryan da Ka mangga man king alang angga.
18.Dalit 48:10
Agpang king Lagyu mu, O Dyos, inya antita mu naman ing papuri ku
angga na karing sikoti ning yatu. Ing wanan mung gamat kisna yang katalarwan.
19.Dalit 52:9
Puryan da Ka king alang angga, uling depatan mu iti:
manaya ku king Lagyu Mu; uling mayap ya iti king arapan ding banal mu.
20.Dalit 54:6
Magi kung malayang midaun Keka:
puryan ke ing Lagyu Mu, O Ginu, uling mayap Ya.
21.Dalit 61:8
Inya pin idalit ku ing kapuryan king Lagyu Mu angga na king alang angga,
bang atupad ku la ring panata ku aldo’ldo.
22.Dalit 63:2-4
Bang akit ku ing upaya Mu at Ligaya, antita kung akit da Ka king santungan Mu.
Uling ing maganaka mung lugud mayap pa kesa king bye, ding labi ku puryan da Ka.
Inya sa’t samban da ka kabang mabye ku: Itas ku la ring gamat mu king Lagyu Mu.
23.Dalit 66:4
Ing mabilug a yatu samban na Ka, at magdalit ya Keka;
magdalit la king Lagyu mu. Selah.
24.Dalit 68:4
Magdalit ka king Dyos, magdalit kang kapuryan king Lagyu Na:
talangan Ya ing makasake karing banwa king Lagyu nang Jah,
at tumula king arapan Na.
25.Dalit 69:30
Puryan ke ing Lagyu ning Ginu kapamilatan ning dalit,
at iapakit ku ing degulan na kapamilatan ning kapasalamatan.
***
DIPARAN, KASEBYAN at KABALDUGAN
Maralas dang sasabyan deng makatwa ing antini kanita:
“Bala maglakad yang masalang bulan.”
Kabaldugan: Masasabi ini kareng taung asna kakupad lumakad. Tsaman-tsaman lang maglakad at ala lang pakyalam keng masasayang a pepandit. Daig de pa ing malintwang at malasing a mangalambut at alang papansingan kareng lalabasnan da. Itang bala bandi da ngan ing sablang oras keti king yatu at pati na ing dalan a lalakaran da.
***
MIKASING-KABALDUGANG, MISALUNGAT
MIKANLAPIT KABALDUGANG AMANU TAMU
1.balungus – kasangkapan ding balang mabibye bang makapangan, makainum, makapagsalita, makipagtalamitan, makiyuma at aliwa pa.
2.asbuk – anti king balungus--kasangkapan ding balang mabibye bang makapangan, makainum, makapagsalita, makipagtalamitan, makiyuma at aaliwa pa. Maingatngat a aske ya ini.
3.pambuk – makatiro asbuk, kasangkapan ding balang mabibye bang makapangan, makainum, makapagsalita, makipagtalamitan, makiyuma at aaliwa pa.
4.labi – pekapasbul ning asbuk. Makapagsalita, makapagdalit, makapangan pauli ning dalan ya iting piluban at pilwalan ning pamangan, angin at danum o aliwa pa.
5.dila – panglasa, panyalita, panyubung, panulak, panuma at aliwa pa--a dake ning asbuk.
6.ngala-ngala – pilatan ning asbuk at gulunggulungan a daralanan ning angin, pamangan, inuman, at aliwa pa.
7.telabanwa – ing pekabubungan ning asbuk.
8.akmulan – ing dane ning batal a nung sanung makapalub pamangan, inuman at aliwa pa king gulunggulungan papunta king dungus.
9.gulunggulungan – ing peka-purtil ning pilatan ning batal, gulunggulungan at ning dungus.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com/ mag-text o maus para karing kutang o munikala: 0942-3924-399 o 0945-3795-270.