“Pauli ning ing amanu ning kurus kabolangan ya karing mangasira,
dapot kekaming mikakabus upaya ne iti ning Dyos.”
~ Mumunang Korintyanu | Dangka 1: Sunis 18
(1 Corinthians 1:18)
“Ninu, anting king kalikasan Dyos,
e na selang-alang pamipatas king Dyos
metung a malyaring gamitan king kapakinabangnan na;
nung e, gewa na ing sarili nang ala kapamilatan ning pamangamit
king peka-kalikasan ning metung a talasuyu,
neng melalang ya king kalupa ning tau.
At king pangayakit king pangayalto ning tau, beba na ing sarili na,
kapamilatan ning pamamintu king kamatayan—agyang kamatayan king kurus!
~ Ding Pilipyanu | Dangka 2: Sunis 6-8
(Philippians 2:6-8)
“Alang mekapunta na banwa nung e mu ing menibatan king banwa—ing Anak ning Tau.
Mengari mu king pamiyangat ning ubingan king ilang,
inya ing Anak ning Tau miyangat ya namang sukat,
inya ding balang manalig kaya mika-alang-angga lang bye kaya.”
~ Wan |Dangka 3: Sunis 13-15
(John 3: 13-15)
“Itingid ta la ring mata tamu kang Yesus, ing miglalang at migpapantas ing kasalpantayanan,
a para king tula a inapag kaya bang pibatan ing kurus, pigsisti na ing kamarinayan na,
at linukluk king dane wanan nang gamat ning luklukang ari ning Dyos.”
~ Ding Ebreu | Dangka 12: Sunis 2
(Hebrews 12:2)
“Nganang Yesus karela ngan:
‘Nung ninung bisang taluki kanaku,
sukat neng isakwil ing sarili na at ibwat ne ing kurus na aldo’ldo at tuki ya kanaku.
Uling ninu man ing bisang ikabus na ing bye na, abating na iti,
dapot ninu man ing makabating king bye na ikabus na iti.”
~ Lukas | Dangka 9: Sunis 23-24
(Luke 9:23-24)
***
E LA ditak ding baranggay o balen a ing patulunan da ya pin ing Santa Cruz o Nwan a Kurus king aldo ini e mu keti king lalawigan nung e mabilug a bangsa at mabilug a yatu. Ing lilimbun da’t sasamban ya pin ing salapung o kurus tagana a nung nu ala yu i YesuKristo—ing kurus mu kabud at ing gayak na.
O’t kaya antita? Agya mang ing kurus sagisag ne ning kaligtasan–malyari tamung makisabi o mangadi kanite? Pepasamba ne ning Dyos ite? Ati yu karing atlung peronas ning Dyos o Trinity?
Neng lilimbun de ing kurus a alang Yesukritu, deng taung lalabasnan ning limbun mangadi la kaniti at deng aliwa yaplus da la ring panyu da o gamat da at yaplus da la naman deti karing dake ding katawan da lalu na detang ating sakit.
Ninu waring pepasamba king kurus? E wari nung ing meyangu tamung pakamalan ing kemate na e ta buring akakit, mababanggit o agaganaka mu man? Mayap ing akakit ta ya ing kematayan ning Ginu tamung Yesus? O ing sasamban ya?
E itang mamarokan ya iti at para king Kapisik ing nanu mang magpaganaka o magpayalaala king Dyos kaninu man sukat yang paulagan inya sa’t ing kurus nung agaganaka taya ing Dyos balang akakit ta ya iti mayap mu naman.
Makanyan man, o’t aliwa namu ing larawan nang YesuKristu ing lawen tamu? O’t aliwa namu ing lagyu na o ding panaral na? O’t ing kematayan na pa o pekamate da kaya yang sasamban da ring e mu mapilan nung e dakal a taung awsan da ing sarili da”Kristyanu”?
Bala mu panaun na bang alilan da ne ing kurus king larawan na ning Ginung YesuKristu.
***
Dake Talabaldugan:
1. mipanampaling (pangdiwa) uyat amanu: tampaling; mipanyapingil, mipapate mipanyapuk lupa. English - spank each other’s face. Alimbawa king pamangamit: “Keng sakit da lub king balang metung—mipanampaling lang patingapun at kabukas.”
2. mipanampulung (pangdiwa) uyat amanu: sampulung; mipanyampulung, pakibalwan ing piyabe-abe dekalan. English - to summarize or get the sum or total of a certain quantity of matters. Alimbawa king pamangamit: “Mipanampulung la ikwang galal deng talapagaral ning kanam a balitang at kanita da abalu nung ninung pekabyasang-dili karela ngan.”
3. mipanamuyut (pangdiwa) agnan mipagyagyag king metung a bage, maulaga man o ali. English - convince each other on something. Alimbawa king pamangamit: “Akalambat dang mipanamuyut kabud-abud metung la mu pala buring malyari deng misiping bale.”
4. mipanamwak (pangdiwa) uyat amanu: samwak; mipangaloko, mipanyalawla pamangan. English - mess up each other’s food. Alimbawa king pamangamit: “Neng ala lang masabal keng ulaga ning pamangan deng mikaluguran mipanamwak la tatalnang pinggan at mengayugse mung agnan ing bakal dang pamangan.”
5. mipanapa (pangdiwa) mipanalo, dinalo agnan o agnan-agnan. English - visit each other at one’s home or place simultaneously or at the same time. Alimbawa king pamangamit: “Neng malambat na lang e mikikit deng miyabe-abe keng pipagaralan da sadya, mipanapa lang liwas-liwas karing sibabale da”
***
SADYANG GAWI DA RENG KAPAMPANGAN
Ing pamanapa o pamanalo kering pengari, kapatad o kakaluguran, metung a gawi tamung Kapampangan a makadukit king kekatamung pangatau. Yapa tala reng maulagang tau kekatamu neng kayaldawan da, neng masakit la o neng paniglon ta la. Iti gagawan tamu e uling tungkulan tamu o utus ding ninu man lalu na ring yapa tamu. King pamanapa tamu magdala tamu agyang kapurit mung bage balu tamung buri da o kaylangan ding yapa tamu bang apamatulan ta la king panyatang tamu karela.
Iti ablasan tamu o ding inapa tamu kapamilatan namu naman ning pamanapa da kekatamu karatang ning panaun a kaylangan tamung iyapa mu naman king nanu mang sangkan. Maralas ing pamanapa gagawan tamu ba’tamung mipanatu, mipamalita o ba’tamung mikit pasibayu.
Ngening panaung kasalungsungan mababating na ing gawing iti at sana naman kalako ning sakit a makayawa e naman makalingwan ing mayap at malagung gawi iti kekatamu.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.