“Dapot ing kebyasnan ibat king babo mumuna dalise, kaybat mapayapa,
banayad, makabusni king katalarwan, kisnnag pakalulu at mayap a bunga,
e mangabiran at tapat.”
~ Santiago | Dangka 3: Sunis 17
(James 3:17)
“Makidalise kayung pusu kapamilatan ning pamamintu king katutwan
para king tapat a lugud mikakapatad, luguran yung lusuk
ing balang metung manibat king dalise pusu. “
~ Mumunang Aklat nang Pedru | Dangka 1: Sunis 22
(1 Peter 1:22)
“Nganang Yeswa, “Ikang mapagkumwari, mumuna ilako me pa
ing asyas king sarili mung mata, at kanita ka manakit malino
bang ilako ing puling ning mata ning kapatad mu.”
~ Mateu | Dangka 7: Sunis 5
(Matthew 7:5)
“Deng e tapat king paynturwan ning makaparikil a kasuywan e da Ku dasnan,
O sinaul karing kasalang, nung e mibalik la king pamibait at pangamate
keti king panglabwad a karinan.
Kapamilatan Ku, king aske Kung makapampan, ing laganas a sikluban mililibutnan ya.
Ding sablang mabibye ati lu Kanaku, dapot ala Ku karela.
Makanyan man ding sablang melalang e la makasandal Kanaku.
Pagumasdan mu ing Kanakung kabal a pibandyan!
Agya mang Aku ing manese karing sablang mabibye,
at agya mang ati Ku mu man karin,
Aku pa mu rin ing kabud mu kabud pagmulan ning pamaglalang.
Nung makananung ing anging masikan, lalabul ya nu man karin,
pane makasandal king pilatang e amalit, balwan mung antita la mu
namang makasandal ding sablang mabibye Kanaku.”
~Dalit ning Kakataskatasang Panginwan | Dangka 9: Sunis 3-6
(The Song of God 9:3-6)
***
Ating taung bala da e na akakit o e na balu ning Ginu ing daraptan da inya nung ati lu king pisamban asno kasalese o kayap papakit karing para dang tau dapot kalwal da aliwa ing pamakiyutus da karing aliwa. Bala da bulag ya king dapat da ing Ginu o para karela masikanan la at ila ring kakabiran ning Apung Ginu. Yapus da ing dapat da at pusu ring tau king dapat at pusu ning Dyos.
Ing tune tapat a tau e ya mengari king anak a tatakut mu karing pengari na inya e na gagawan ing babawal da kaya at gagawan na ing utus da kaya uling tatakut yang mikamwanan o mabarug nung salungat ya king kaburyan da reti. Ing katapatan makayagpang king mayap a pamipaulaga ning ninu man inya agyang alang manakit—gagawan na nung sanu ing mayap at e na gagawan nung sanu ing marok o sanu ing e na katulan ning pakamalan—pengari ya man, asawa ya, kakaluguran ya o ing Panginwan.
Likas na king taung tapat ing e mamirait, e maglaram at e gawang pasalikut a ikasakit na lub ning pakamalan. Makasalang-alang ing panamdaman na ning pakamalan na karing sablang gagawan na at pati na king isipan na, sasabyan na at agyang alang manakit—pati na king kapanamdaman na o o nung nanu ing laman ning kayang pusu.
***
Dake Talabaldugan:
minalak (pangdiwa) migbalak, memalak, ginawang balak. English – planned, made some plans, thought out, mapped out, chalked out, drafted. Alimbawa king pamangamit: “Ninu ing minalak keng pamangawa king tete keng libutad ning Masiku at ning Kulyat, o't e de gawan pipagpatinganginan keng dane ning Bunduk Alaya?”
minalakak (pangdiwa) melakak, malakak kabang matudtud o ating sakit a mabayat. English – snored, wheezed, snorted, snuffled, breathed heavily while sleeping. Alimbawa king pamangamit: “Mengasdan ya ing pusang dintang keng bubungan inyang minalakak yang bigla ing koya ku inya mipalundag yang pabalik king penibatan nang sumangid bubungan.”
***
DIPARAN, KASEBYAN at KABALDUGAN
Maralas dang sasabyan deng makatwa ing antini kanita: “Kakanan na pati tinga na .”
Kabaldugan: Ya pin ing taung lusuk katipid at kadamut. Ala yang buring masayang, ala yang buring miyugse agyang nanung malyari nang pakinabangnan. Buri na agyang mebangnas nang pamangan papalyaryan na pang ating makapangan. Uyta mu pin, agyang singkung maklak e na buring gastusan nung e na nabangnan.
Oneng keng kaparatutan agyang kata-katang salapi agyu nang gisanan nung makapagpangaya ya at makilala o mibantug ya. Kabang titipiran nang bina patin sarili na, pati pamamangan na inya pati tingan na kakanan na.
***
MIKANLAPIT KABALDUGANG AMANU TAMU
aldukan – pakabid a pamagpalub king asbuk king pamangan lakwas na nung inuman o mabasa iting pamangan o agyang e pa pamangan.
ututan – ulit-ulit pakayalduk ing sabo, danum o nanu mang mabasang bage kabang makapatilus ya ing asbuk.
ukukan – anti keng ututan o aldukan dapot magagamit mu kabud keng bage malyaring inuman.
labulan – ipalwal ing inawa o angin keng asbuk manibat karing baga, dumalan king gulunggulungan at lumwal king balungus o mekad kambe ning arung.
tsupan– anti mu naman king labulan, ipalwal ing inawa o angin keng asbuk manibat karing baga, dumalan king gulunggulungan at lumwal king balungus o mekad kambe ning arung.
iyapsa – ipalwal ing ininum o pengan keng asbuk manibat karing baga, dumalan king gulunggulungan at lumwal king balungus.
ibugka - ipalwal bigla at masikan ing inawa o angin, o nanu mang laman ning asbuk.
isuka – ipalwal bigla at masikan ing pengan, o nanu mang laman ning dungus king asbuk.
ilura – ipalwal bigla ing nanu mang laman ning asbuk a danum, wawa o nanu mang bage a laman nang mabasa.
***
Salamat pung dakal king pamanangkilik keng Kapisik at SunnStar Pampanga. Malyari ko pung mag-email keng kek’ong talasulat king garciakragi@yahoo.com/ mag-text o maus para karing kutang o munikala: 0942-3924-399 o 0945-3795-270.