“O talapagsisti ding kasalang,ing pamidaun king belwan lakwas yang makayapan
kesa king pamidaun karing pibandyang panglabwad. O anak nang Prita,
kayabtas ning segana-gana, ing pamidaun king pamangawa mapupupus ya
king kakataskatasang belwan.
Pakikwanan mung apanigaralan ing katutwan kapamilatan ning pamaglapit
king talaturung pangdiwa. Mangutang mapakumbaba kaya at miyapse pamanyuyu kaya.
Ing kaladwang mekakilala na king sarili malyari yang midake belwan keka
uling ikit na na ing katutwan.
At nung apanigaralan mu na pin ing katutwan, abalu mung deng sablang mabibye
dake Ku la ngan - - at ing ati lu Kanaku, at Kanaku la.
Agya mang metanggap kang pekamakasalanang dili karing makasalanan,
kabud makabili ka king daung ning kamigit-migitang belwan,
alipatan mu na ngan ing laut ding kasakitan.
Nung makananung ing aping lalagablab gagawan nang abu ing tatamban,
O Ardyun, makanyan mu namang ing api ning belwan dadapugan na lang anting abu
ding sablang ablas ding makalabwad a kararaptanan.
King labwad ayti, ala nang lusuk makataluktuk at wagas pa king kamigit-migitang belwan.
Ing belwang iti ya pin ing malulut nang bunga ding sablang kakabalan.
At ninu mang disnan na na iti adaranas na na ing sarili king sarili na
king malagwang pilandit ning panaun.
Ing tapat a taung makatalbug king kamigit-migitang belwan at ing makasambut
karing panamdam na mabilis nang akapirasnan ing kakataskatasang pandiwang kapayapan.
Dapot ding alang balu at alang kapanaligan tau a mikelangan karing makabulalag
a kasulatan e da apakirasnan ing panimanman king Apung Ginu.
Para king mikakunung kaladwa alang ligaya keti man king labwad ayni o king tutuki.
Inya pin, ninu man sinakwil karing bunga ning keyang dapat,
a nung nu ring pamikakunu na sinira na la ning kakataskatasang belwan,
at yang makabiling binit king sarili, e ya makatali karing gawa,
O sinaul karing pibandyan.
Inya ding kapikakunwan a binangun king pusu mu pauli ning kelang belwan
dapat lang matabas king sandata ning belwan. Makasandata ya king yoga,
O Barata, tikdo ka’t lumaban!
~ Dalit ning Kakataskatasang Panginwan | Dangka 4: Sunis 33-42
(The Song of God, 4: 33-42)
“Ding tukal nang bitis ning Guru ila rnu kabud
ding paralan bang apakirasan ing makatagulaling a kasuywan.
Duruku ku karing tukal nang bitis ating dakilang kasdan at pamigalang,
King kapamilatan ning kalam na, ninu man malyaring dalakit
king laut ning daung makalabwad at akwa ing pakalulu nang Kris'na.
Ing kabud mung pagnasan ku ya pin ing dalise ya sa ing panimanman ku
kapamilatan ding amanung manibatan king tukal mung asbuk.
Ing lakap karing tukal mung bitis ya ing kapantasan
a magpatupad karing sablang kapagnasan.
Bisni mu la ring medalumdum kung mata
at kisna me ing pusu ku king belwan a kakataskatasan.
Ika ing panginwan ku beytan kaybat ning beytan.
Keka manibatan ing makabusul a lugud;
kapamilatan mu ing kamangmangan malalasak.
Ding aklat ning belwan daralit da ing kekang panugali.
Ing kekatamung Guru ing laut ning pakalulu,
Ing kakaluguran da ring maluka, at ing panginwan at talaturu da ring sablang talasuyu.
Ing kebantugan mu makalaganas karing atlung labwad.
~ Milikas a “Dalangin king Guru” nang Narottama Das Thakur
a kinudta king dalit a “Sri Guru Vandana”
***
Likas karing mabibye ing byasa lang tambing mangan o mantun pamangan anti nung makananung tambing lang byasang mangisnawa, kimut, bumulad, lumawe, agya mang e la pa malino o tutung manakit. Iti katutwan lakwas na karing kaladwan o animals. Ding asan at aliwang mabibye king danum likas lang byasang kawe at sumungab; ding ayup, talibatab, tulang, tagubang at aliwa pa, tambing lang makasulagpo kabud miganap na la pakpak; atin mu namang byasang mamulandit mabilis agyang anak la pa anti karing usa, kuneu, kabayu at aliwa pa.
Tambing la namang byasang makipangatawan bang dakal la palipi. Nung ali magisan la ring tau at aliwang mabibye. Byasa la namang maningat at pakan o mantun pamangan e mu para karela nung e lakwas na para karing supling da. Byasa la naman at likas Karela ing mitalakad bale o gawang sale o mantuntuknangan o santungan.
Dapot ating maulagang bage king bye ning tau ing kaylangan ya ing talaturu o manuru karing bingut ba’lang mabyasang sakab, kumusad, gumapang, mamalebe, magpatala at angga na king lumakad. Pati na king pamamaulandit, pamangawe o karing mayap gawi at panugali kabang daragul la. Inya sa atin mu namang pipagaralan bang mabyasa lang mamasa, sumulat at magsalitang anting melinang, manayun at makatud.
Ating bage a e ta malyaring gawan nung alang kasangkapan o aliwang lelangan ing sumaup kekatamu. Makanyan man, itamung tau ing ating kegiwan king pamikatagun a abalu tamu uling byasa tamung mangutang, manaluse at manigaral. E ta mu naman kabud mu byasang kawe, magpaganang saken at lakwas na sulagpo anting ayup. Deti kaylangan panigaralan, at nung pagaralan la, kaylangan ya ing talaturu ba’kang mabyasa, misane at agamat ing panigaralan mu.
Inya ating pipagaralan uling e ta malyaring ituru ing sarili tamu. Ing pamanurud king sariling bwak pin asna kasakit lakwas na nung metung ya mu ing salamin. Ing pamangawe, pamagbisikleta, e la binang masakit gawan dapot kaylangan ya ing manuru. Nung e ka megaral e ka malyaring manuru.
Antita mu naman ing pamangilala king Dyos. E ya kabud akikilala o ababalu nung makananung lumapit Kaya. Kanita ya menalimbawa o minye alimbawa ing Ginung Yesukristo. Agya mang e na kaylangan ing paturu, lepitan ne i Wan a Talapaminyag (o John, the Baptist) bang magpabinyag bang pakit alimbawa a itamu ngan sukat tamung lumapit bang manigaral lalam ning Guru o Spiriutal Master bang abalu tamu ing nung itamu o ing sangkap tamu, nanu ing kabilyan tamu at nung nanu ing kasangkapan tamu. At ita ing kamumulan ning pamangilala king Dyos—ing pamangilala king sarili anting diwang kaladwa o spirit soul. Ita ing mumunang balitang.
Ing tune Guru o Talaturu (bona fide Spiritual Master) ya mung malyaring magkalub king belwang ita.
***
Salamat pung dakal king pamanangkilik keng Kapisik at SunStar Pampanga. Malyari ko
pung mag-email keng kek’ong talasulat king muirbiliuqeitpo@gmail.com mag-text o maus para karing kutang o munikala: 0942-3924-399 o 0945-3795-270.