“Mamye kung kapasalamatan king Ginu pauli ning katalarwan Na;
Idalit ku la ding papuri king Lagyu ning Ginung Kakataskatasan.
~ Dalit 7:17
“Pasalamat ku Keka, Ginu, king mabilug kung pusu;
Sabyan ku la ngan ding makapagmulala Mung dapat.”
~ Dalit 9:1
“Pasalamatan da ka king maragul a laguma;
karing malda ipagdalit da Kang kapuryan.”
~Dalit 35:18
“Ume kayu at magdalit tamung tula king Ginu:
gulisak tamung masikan king Batu ning Pangakabus.
Ume tamu king arap na kapamilatan ning kapasalamatan
at puryan Ya king lawiwi at dalit.
Uling ing Ginu Yang Dakilang Dyos.
Ing Dakilang Ari babo ring sablang dyos.”
~Dalit 95:1-3
“Lungub karing pasbul nang ating kapasalamatan
at ding bulwagan nang ating papuri;
pasalamat Kaya at puryan Ya ing Lagyu Na.
Uling mayap ya ing Ginu at ing lugud na lalambat alang-angga.;
ing katapatan Na mibalalaus karing tutuking dai.”
~Dalit 100:4-5
“Bustan lang pasalamat king Ginu pauli ning lugud nang e sasala
at ding makapagmulalang dapat na para king metuketawan.
Bustan lang midaun ampang pasalamat
at ipasyag la ring dapat Na kapamilatan ding dalit ning tula.”
~Dalit 107:21-22
“Magdalit king Ginung ating mapasalamat a papuri;
manigtigang lira king Dyos.”
~Dalit 147:7
“Pasalamatan da Ka, Dyos ding kanakung pipumpunan;
Pigkaluban mu kung kebyasnan at upaya;
pepabalu Mu kanaku ing inyawad mi Keka,
pepabalu Mu kekami ing tagimpan na ning ari.”
~Daniel 2:23
“E kayu paylasing king alak, a miraras king pamagsalwak sabi king labwad.
Nung e, mikapmwan king Diwa, mipagsalita king balang metung kapamilatan ding dalit,
tigtigan at lawiwing manibatan king Diwa. Magdalit at gawang lawiwiing ibat king pusu
para king Dyos Ibpa para karing sablang bage, king lgyu ning Ginu tamung YesuKristo.”
~Episyanu 5:18-20
“E kayu paybalisa dikil king nanu mang bage, dapot king nanu mang kabilyan,
kapamilatan ning pangadi at kapanyawaran, ating kapasalamatan,
ilapit la ring pakisabing mayap king Dyos. At ing kapayapan ning Dyos,
a lalagpus kiong sablang kasanakan, banten na la ring pusu yu
at isip kapamilatan nang Yesu Kristo.”
~ Pilipyanu 4:6-7
“Inya kanita, nung makananu yeng tinggap i Yesu Kristo anting Panginwan,
ibalaus yung bumye karing bye yu kaya, makayamut at makatikdo kaya,
mesikan king kasalpantayanan anti king pangaturu yu, at lapo-lapo king kapasalamatan.”
~Kolosyanu 2:6-7
***
Ing kapasalamatan maragul yang bage king pamanyuyu king Ginu at iti kambe na ya ning kapakumbaban. Iti uling ing kapasalamatan tanda ne ning utang lub a asna karakal at e abilang-bilang a pagkalub nang kalam ning Apung Ginu kekatamu. Paralan ya iti bang balikid karing kalam a anting ulu a alang patugut mamagus bang ilako ing kau ring kaladwa king lugud ning Ginung e tamu paulagan, e tamu pakamalan nung e pilit tamung wawaglit karing pusu, isipan at bye tamu.
Ing kapasalamatan tanda na ning alang malyaring pamalit a lugud uli ning keynan tamu at kelang-upayang miral at bumye lubusan a makarayu king Ginu—a kamatutwanan mu e malyaring gawan tamu uling nu man karin, kapilan man at nanu mang gawan tamu e ta malyaring dayu Kaya agyang nanung gawan tamu nung e Na mu rin payntulutan.
Makanyan man, nung tapatan tamung lumapit kaya agyang metung mung takbang—makatalibu yang takbang bang lapitan na katamu, at kaulan bang tanggapan pasibayu karing kaul nang matigik pauli ning alang-panayang lugud at alang-anggang pakalulu Na kekamatu.
Dakal a salamat pu, Ginu!