“King paralang ayni ing misane kaladwa a manuknagan
kilub ning katawan akakalingwan na ing pangamakasarili na uling kikilalanan na
ing sarili na anti ing katawan. Pauli ning ing katawan makalabwad ya,
ing likas na kapupuntalan ya pin ing magagayuma ya karing miyayaliwang bage
king makalabwad a yatu. Inya sa't ing mabibye lelangan pagdusan na la
ring kasakitan king makalabwad a pamaniral.”
~ Pigmulang Salese ning Dyos| Dalit 7: Dangka 13: Sunis 28
(Bhagavat Purana 7.13.28)
“Nung makananung ing api, a milalablab at sislag, aliwa ya king dutung a panangab,
a sisilaban bang magkalub aslag, antita mu naman a ing talapanakit kilub ning katawan, ing miyaslagan-sariling diwang kaladwa, aliwa ya king katawang makalabwad,
a aslagan ning panimanman. Inya sa't ing kdiwang katawan at ing katawan
atin lang miyaliwang katangyan at mikakaliwa lang bage.”
~ Pigmulang Salese ning Dyos| Dalit 11: Dangka 10: Sunis 8
(Bhagavat Purana 11.10.8)
“Ninu man a miyaslagan na king pamangilala king sarili agya mang manuknangan
king makalabwad a katawan, akakit na ing sarili na anting lakwas kakataskatasan
king katawan, nung makananung ing ninu man milingat king paninap tatabili na
ing pamikabas king katawan ning paninap.”
~ Pigmulang Salese ning Dyos| Dalit 11: Dangka 11: Sunis 8
(Bhagavat Purana 11.11.8)
“Ing kaladwang ati kilub ning katawan maslag yang dili na at aliwa ya
king mayayakit a kabilugang katawan at e mayayakit a banayad a katawan.
Mandatila ya iti anting makabalangkas a piyagpangan ding manaliwang pamaniral
ning katawan nung makananung ing e atatagklilang banwa ya pin
ing e magbayung gulutan na ning makalabwad a pamanaliwa.
Inya sa't ing kaladwa ala yang wakas at ala yang kayambing a makalabwad.”
~ Pigmulang Salese ning Dyos| Dalit 12: Dangka 5: Sunis 8
(Bhagavat Purana 12.5.8)
***
Maralas dang sasabyan deng keraklan a tau--“ing kaladwa ku”. Mangabaldugan itang ika ing katawan at maragul a kamalyan ita. Nung e mu pa akalingwan, nung Kristyanu ka at abasa mu ne ing Biblya, sinabi ning Ginung Yesukristu a “Ing laman at daya e na amana ing kayaryan na ning Dyos.” Mababasa ita king Mumunang Aklat ning Korintu, Dangka 15: Sunis 50.
Dapot kebalwan tamu anting talasalpantaya a malyari ta ngan makauli king kayaryan na ning Dyos, e wari? E wari mibansagan yang Talapangabus ing Ginung Yesukristu? Dintang ya keti bang ikabus na katamu agpang king Banal a Kasulatan at king turu da ring pekapun ning pisamban.
O nung ika ing katawan o kasi laman at daya ing babalangkas keka! E me malyaring amana o dasan ing kayaryan ning Dyos nung ita ing katutwan (ita naman tagana!) agpang king mipasyag king mumunang aklat ning Korintu, Dangka 15: Sunis 50.
Ing maualagang kutang – para nanu pa ing panyatang nang Kristu keti yatu nung antita pala a e ka malyaring mikabus? Makanyan man, aliwa naman ita ing tune pake na keting Kristu, dapot aliwang pisasabyan ita.
Karing minunang dalan-dalan a sunis makasulat bao ning Kapisik ayni a meyangu karing Pigmulang Salese ning Dyos o Bhagavat Purana malino mipasyag kareta ing maragul la pamiyaliwa ding kaladwa at katawan at aliwa itamu ing katawan. Sukat dang malinawan nung balu da iti ring pekapun ning pisamban agyang agpang mu karing belwan a makapasyag king Biblya at e na karetang sunis a menibat karing Vedas.
***
Dake Talabaldugan
minano – pakutang a minanu, mipakananu, nanung milyari. English – What happened? What's up? Howdy? Alimbawa king pamangamit: “Ala kanung balita kareng minta keng laut dapot ating tutung makibalu nung minano?”
minanu – papasyag a kutang, mipakananu, nanung milyari. English – What happened? What's up? Howdy? Alimbawa king pamangamit: “Ala kanung balita kareng minta keng laut dapot ating tutung makibalu nung minano?”
***
DIPARAN, KASEBYAN at KABALDUGAN
Maralas dang sasabyan deng makatwa pati na ding kayanakan a kabalen ing antini: “Ing impun a mamayutputan bunga yang parating pamaronggan da”. Wa pin naman, nanung akwa mu keng impun a alang bunga. Masayang la ring batu o bugang pupukul mu uling alang nanu mang mabalag metung mang bunga kaniti.
Kabaldugan: Kareng tau, deng masanting o malagu, deng byasa, deng mibantug at ding masalapi ila ring pangalalwan da inya pin ila ring pag-indredus da lakwas na neng pakagulut la. Mengari la kareng impun tanaman a sapasapunggul bunga inya pin sa't pamasibasan da lang alang patugut.
***
MIKANLAPIT at MISUGLUNG KABALDUGANG AMANU
mesora – panamdam a ablas king e mayap a biru, salita o dapat.
mesumami – anti king mesora, panamdam a abalas king e mayap a biru, salita o dapat.
mesukmami – anti king mesora at mesumami, panamdam a ablas king e mayap a biru, salita o dapat. Maralas sasabyan da reng makatwa dapot e na alus magagamit king kasalungsungan,
mekulami – aliwang aske ding mesora, mesumami, mesukmami a maralas sasabyan da reng makatwa at mapilang dake ning Kapampangan dapot e na alus magagamit king kasalungsungan.
mepikun – menasakit keng biru o pigsisti a masakit mu naman para king biniru o pigsisti.
mebusit – mengari king mepikun dapot Kepampanganang Kastila iti ning mepikun.
mepika – aliwang pamanyabi king mepikun.
mikasbu – mipalabis sora inya megi nang kamwa.
mikapali – aliwang aske o pamanyabi king mikasbu.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king muirbiliuqeitpo@gmail.com mag-text o maus para karing kutang o munikala: 0942-3924-399 o 0945-3795-270.